უზენაესი სასამართლოს უვადო მოსამართლეობის კანდიდატი, ნინო ქადაგიძე ამბობს, რომ 2004-2012 წლებში "შეუძლებელია სასამართლო ყოფილიყო აბსოლუტურად თავისუფალი". ამაზე მან დღეს, 4 ნოემბრის საკომიტეტოს მოსმენისას, ეკა ბესელიას კითხვის პასუხად თქვა. მოსამართლემ აღნიშნა ისინ, რომ პირადად მასზე ზეწოლა არ ყოფილა:

"როცა ზეგავლენის მომხდენი პირები უშუალოდ არიან იმ ორგანოში, რომელიც ფაქტობრივად წარმართავს სასამართლოს პოლიტიკას, შეუძლებელია არ ყოფილიყო [პოლიტიზირებული]. ალბათ, სავარაუდოდ, იქნებოდა. ეს რომ ასე არ ყოფილიყო, არც ცვლილებების საჭიროების წინაშე არ დავდგებოდით. ჩემზე ზეწოლა არ ყოფილა. მე ამას სრული კატეგორიულობით ვამბობ. მე ვაგებ პასუხს თითოეულ ჩემს ხელმოწერაზე. მე პირადად მიმაჩნია, თუ შენზე ზეწოლაა, ან ხმა უნდა ამოიღო, ან თუ ვერ ამოიღებ ხმას, უნდა წახვიდე სისტემიდან".

ნინო ქადაგიძე 2002-2012 წლებში იყო საქართველოს უზენაესი სასამართლოს მოსამართლე. 2013 წლის 17 ივნისიდან იგი თბილისის სააპელაციო სასამართლოს ადმინისტრაციულ საქმეთა პალატის მოსამართლეა.