საქართველოს პარლამენტმა ქუთაისის ტექნოლოგიურ ინსტიტუტს სახელი გადაარქვა. ახლა მას ქუთაისის საერთაშორისო უნივერსიტეტი ეწოდება.

კანონის მიღებას მხარი 82-მა დეპუტატმა დაუჭირა, მოწინააღმდეგე მხოლოდ 1 იყო. ცვლილებები ტექნოლოგიური ინსტიტუტის შექმნის შესახებ საქართველოს კანონში შევიდა.

ტექნოლოგიური ინსტიტუტისთვის სახელის შეცვლის მიზნით კანონპროექტი საქართველოს განათლების, მეცნიერების, კულტურისა და სპორტის სამინისტრომ მოამზადა.

ტექნოლოგიური ინსტიტუტის მშენებლობა 2016 წელს საქართველოს მაშინდელმა პრემიერ-მინისტრმა გიორგი კვირიკაშვილმა გახსნა. 2019 წლის სექტებერში პროექტის პრეზენტაცია თავიდან გაიმართა. ამჯერად საგანმანათლებლო სივრცე, რომელიც მე-3 წელია ვერ აშენდა ქუთაისის საერთაშორისო უნივერსიტეტად მოიხსენიეს. მთავრობის წევრებმა და პროექტის ავტორებმა თქვეს, რომ უნივერსიტეტი სტუდენტებს 2020 წელს მიიღებს.

ქუთაისის საერთაშორისო უნივერსიტეტის ფეისბუქგვერდზე წერია, რომ მოდელი შემუშავებულია მიუნხენის ტექნიკურ უნივერსიტეტთან მჭიდრო თანამშრომლობით. იგეგმება, რომ უნივერსიტეტი თანამედროვე ინფრასტრუქტურითა და ტექნოლოგიებით აღჭურვილი საგანმანათლებლო სივრცე იყოს.

"ქუთაისის საერთაშორისო უნივერსიტეტი იქნება სამეცნიერო და სასწავლო სერვისების წამყვანი პროვაიდერი, მეცნიერების და ტექნოლოგიების საერთაშორისო ცენტრი მთელს რეგიონში. ის გახდება საერთაშორისო საგანმანათლებლო სივრცეში საქართველოს პოზიციონირების უმნიშვნელოვანესი კომპონენტი . უნივერსიტეტის მართვის სისტემა, საგანმანათლებლო მიმართულებები, მკვლევართა და ლექტორთა შერჩევის წესი შესაბამისობაში იქნება მიუნხენის ტექნოლოგიური უნივერსიტეტის (Technical University of Munich, TUM) მართვის სისტემასთან, რომელთანაც ქუთაისის საუნივერსიტეტო ქალაქი 2017 წლიდან თანამშრომლობს", — ვკითხულობთ განცხადებაში.

პროექტის პირველ ფაზაში 170 ათასი კვადრატული მეტრის ფართის შენობა-ნაგებობების აშენებაა დაგეგმილი, რომელიც 3 სასწავლო კორპუსს, 3 სტუდენტურ საერთო საცხოვრებელს, საცხოვრებელ კორპუსს პროფესორ-მასწავლებელთათვის, ცენტრალურ ბიბლიოთეკას და სასადილოს მოიცავს. შემდეგ ეტაპებზე დამატებით 2 სასწავლო კორპუსის აშენება იგეგმება — ადრონული თერაპიის ცენტრი, საუნივერსიტეტო კლინიკა, ლაბორატორიები და სამეცნიერო-კვლევითი დანიშნულების სხვა ობიექტები.