ენმ-ს წევრი, რომან გოცირიძე ლარის გაუფასურების მიზეზებზე კურიერის ეთერში საუბრობს და განმარტავს, რომ აღნიშნულის მიზეზი ის ეკონომიკაა, რომელსაც მთავრობა 4 წლის განმავლობაში ახორციელებდა:

"ლარი დიდი ხანია უფასურდება. შეიძლება ვთქვათ, რომ მთელი აგვისტოდან მოყოლებული ლარი გაუფასურების რეჟიმშია, ოღონდ ამ ხნის განმავლობაში ეროვნულმა ბანკმა დახარჯა 180 მილიონი დოლარი, ეს არის უზარმაზარი ინტერვენცია, ჩვენ ვხედავთ, რომ ეს კბილებით უჭირავს ეროვნულ ბანკს. ამ გაუფასურების ერთ-ერთი უმთავრესი მიზეზი არის ის ეკონომიკური პოლიტიკა, რასაც აწარმოებდა მთავრობა 4 წლის მანძილზე.

მთავრობამ არ უნდა აწარმოოს ის ეკონომიკური პოლიტიკა, რომელსაც ახლა ჩვენ ვხედავთ. ბიუჯეტის შემცირება ყოველთვის იყო გამოსავალი, ჯანსაღი არადეფიციტური ბიუჯეტი, არარაციონალური ხარჯების შემცირება, ყოველთვის იყო გამოსავალი. არასდროს არ წაშველებია მთავრობა ეროვნულ ბანკს".

13 ოქტომბრის კურსით, სავალუტო ჯიხურებში ერთი დოლარის ყიდვის ფასია 2,380 ლარი, ხოლო ერთი ევროს ფასი - 2,625. ეროვნული ბანკის ოფიციალური გაცვლითი კურსით, ერთი დოლარის ღირებულება 2,3527 ლარია, რაც წინა დღის მონაცემთან შედარებით 0,0162-ით მეტია.