ევროკავშირის სადამკვირვებლო მისია (EUMM) ოკუპირებულ ცხინვალს ახალგორთან დაკეტილი ე.წ. საზღვრის, რაც შეიძლება სწრაფად გახსნისკენ მოუწოდებს.

ევროკავშირის მისიის განცხადებაში ნათქვამია, რომ ახალგორის რაიონში მცხოვრები მარგო მარტიაშვილის გარდაცვალების გამო ე.წ. ცხელი ხაზი გააქტიურებული არ ყოფილა.

"ასეთი ტრაგიკული შემთხვევები აჩვენებს მოსახლეობის გადაადგილების მკაცრად შეზღუდვის ზეგავლენას. მთავარი გამშვები პუნქტი, სადაც დღეში 400-მდე გადაადგილება ფიქსირდებოდა, 5 სექტემბრიდან სრულად ჩაკეტილია. ახალგორის მაცხოვრებლებს ეს ართმევს ოპერატიული და ადეკვატური სამედიცინო დახმარების შესაძლებლობას და საარსებო წყაროებს უზღუდავს. ევროკავშირის სადამკვირვებლო მისია აგრძელებს ამ საკითხზე მონიტორინგს.

ახალგორის მაცხოვრებელი 28 ოქტომბერს გარდაიცვალა. მედიაში გავრცელებული ინფორმაციით, ის სასწრაფო დახმარებამ სახლიდან მძიმე მდგომარებაში გამოიყვანა და თბილისში წაყვანა სცადა, თუმცა ე.წ. მესაზღვრეებმა ცხინვალში გადაამისამართეს, სადაც საავადმყოფოში გარდაიცვალა.

გარდაცვლილის შვილი მთავარ არხთან სატელეფონო ინტერვიუში აცხადებს, რომ სავარაუდოდ, დედის დაკრძალვას ვერ დაესწრება, რადგან ე.წ. საზღვარი ისევ ჩაკეტილია.