საქართველოს ეკონომიკის სამინისტროს ინფორმაციით, მინისტრი ნათია თურნავა თბილისის საერთაშორისო აეროპორტის დათვალიერებით უკმაყოფილო დარჩა და ოპერატორი, ტავ ჯორჯია გააფრთხილა. უწყებაში აღნიშნავენ, რომ კომპანიას ხარვეზების გამოსასწორებლად ვადა მისცეს.

"დღეს დავათვალიერე ორივე ტერმინალი და უკმაყოფილო დავრჩი, რადგან კვლავაც ძალიან ბევრი ხარვეზია აღმოსაფხვრელი. ჩვენ ძალიან მკაცრი გაფრთხილება მივეცით ტავ ჯორჯიას. აქვე უნდა აღვნიშნო, რომ ტავ ჯორჯია ამჩნევს ამ პრობლემებს და დროულად უზრუნველყოფს მათ გამოსწორებას", — აღნიშნა ნათია თურნავამ.

მისივე თქმით, აეროპორტის ტერიტორიაზე მოსაწესრიგებელია სველი წერტილები, კაფეები და რესტორნები.

"ამ ვადის გასვლის შემდეგ კიდევ ერთხელ ვეწვევი თბილისის საერთაშორისო აეროპორტს და გადავამოწმებ რამდენად ხდება პრობლემების აღმოფხვრა", — დასძინა ნათია თურნავამ.