რამდენიმე დღეში საპარლამენტო არჩევნების მეორე ტური 50 საარჩევნო ოლქში გაიმართება, რომელშიც ძირითადად ენმ-სა და ქართული ოცნების მაჟორიტარობის კანდიდატები მიიღებენ მონაწილეობას.

On.ge დაინტერესდა, ვის დაუჭერს რესპუბლიკური პარტია არჩევნების მეორე ტურში მხარს და პარტიის ერთ-ერთ ლიდერს, ლევან ბერძენიშვილს პარტიის საერთო პოზიციის შესახებ ჰკითხა. ბერძენიშვილმა კი განგვიმარტა, რომ რესპუბლიკური პარტიის ამომრჩეველთა რიცხვი იმდენად პატარაა, რომ პარტია "სახუმარო მოწოდებებს" თავისი ამომრჩევლისთვის არ გააკეთებს:

"ოლქში, სადაც ჩვენი პარტიის წევრი იღებდა მონაწილეობას, არანაირი სურვილი არ მაქვს არჩევნებში მონაწილეობა მივიღო. ჩვენ არ გვყავს იმდენი ამომრჩეველი, რომ ვინმეს რამე სერიოზულად მოვუწოდოთ. პარტიის თითოეული წევრი ინდივიდუალურად მიიღებს იმ გადაწყვეტილებას, რომელიც მას სურს. ან მიიღებ მონაწილეობას, ან არა. პარტიული გადაწყვეტილება ამასთან დაკავშირებით არ გვაქვს. რაც შეეხება ჩემს პირად პოზიციას, ის ჩემი პირადი პოზიციაა".

12 ოქტომბერს, გადაცემა არჩევანში, რესპუბლიკური პარტიის ერთ-ერთმა ლიდერმა, დავით ბერძენიშვილმა მოქალაქეებს მოუწოდა, მეორე ტურში მხარი დაუჭირონ იმას, ვინც ტექნიკურად ხელს შეუშლის საკონსტიტუციო უმრავლესობის შექმნას პარლამენტში.