"დარწმუნებული ვარ მეორე მხარეს რომ ჰკითხოთ, აბსოლუტურად სხვა მოსაზრება ექნება მასთან დაკავშირებით", — ასე გამოეხმაურა პარლამენტის ვიცე-სპიკერი, თამარ ჩუგოშვილი ყოფილი პროკურორის, სალომე ადეიშვილის ფეისბუქპოსტს. ადეიშვილი პოსტში პროკურატურაში არსებულ პრობლემებზე, მათ შორის სექსუალურ შევიწროებაზე, უკანონობასა და ზეწოლაზე საუბრობს.

ჩუგოშვილი აცხადებს, რომ კონკრეტულად მისი ისტორია არ იცის და არც ისაა მისთვის ცნობილი, ვინ არის ეს ადამიანი.

"თუ საუბარი არის იმაზე, რომ ის განიცდიდა შევიწროებას და ჰქონდა შევიწროების განცდა, მე გეუბნებით, რომ ქვეყანაში შევიწროებისგან დაცვის მექანიზმები არსებობს, ეს მექანიზმები არის გამართული და მუშაობს კარგად", — აღნიშნა ჩუგოშვილმა.

ყოფილმა პროკურორმა, სალომე ადეიშვილმა სამსახურის დატოვების შესახებ ინფორმაცია გუშინ, 22 ოქტომბერს გაავრცელა. ვრცელ პოსტში მან პროკურატურაში არსებულ ვითარებაზე დაწერა.