უზენაესი სასამართლოს მოსამართლეობის კანდიდატს, გიორგი მიქაუტაძეს არასამთავრობო სექტორის მხრიდან კრიტიკა მუქარა ჰგონია. პარლამენტში გასაუბრებაზე მიქაუტაძეს ეს განცხადება დეპუტატმა, გიგა ბოკერიამ შეახსენა.

ბოკერიამ მიქაუტაძეს ჰკითხა, როცა ერთ-ერთ განცხადებაში ამბობდა, რომ "თავი უნდა დაიცვან როგორც ხელისუფლების, ისე არასამთავრობო სექტორის მუქარისგან", როგორი სახის მუქარას გულისხმობდა არასამთავრობოების მხრიდან.

"მაგალითად, შემიძლია გითხრათ, რომ იყო ძალიან აქტიურად დაყენებული მოთხოვნები, რომ მოსამართლეები უნდა გათავისუფლდნენ და მიეცნენ პასუხისგებაში და მე ვთვლი, რომ ეს არის მუქარა, დიახ", — თქვა მიქაუტაძემ.

ამ განცხადების შემდეგ ბოკერიამ მას დაზუსტება სთხოვა, არის თუ არა მოსაზრება, კრიტიკა და მუქარა ერთი და იგივე. მიქაუტაძემ ამის პასუხად თქვა, რომ მოსაზრება, კრიტიკა და მუქარა შესაძლებელია, გამოხატული იყოს და ერთი და იგივე ტექსტით.