ეკონომიკის ყოფილის მინისტრის, გიორგი ქობულიას განცხადებით, არასწორია იმაზე საუბარი, რომ ქართული ღვინო რუსულ ბაზარზე არ უნდა გავიდეს. ამის შესახებ მან მთავარი არხის ეთერში ისაუბრა.

"რატომ არ შეიძლება ჩვენმა გლეხმა მოსავალი გაიტანოს რუსეთში, სადაც იცნობენ", — იკითხა მან და განმარტა, რომ რუსი ტურისტები და რუსული ბაზარი საჭიროა, რადგან საქართველოს ევროპის ბაზარზე შესასვლელად ინფრასტრუქტურა და კაპიტალი სჭირდება. მანვე აღნიშნა, რომ რუსული და ამერიკული ბაზრების შედარებაც არასწორია, რადგან ამერიკაში დიდი კონკურენციაა.

"სად ამერიკაში გაყიდული ღვინო და სად რუსეთში გაყიდული ღვინოს რაოდენობა. მე როგორც ეკონომისტი გეუბნებით, ამერიკაში არის უდიდესი კონკურენცია და სანამ ჩვენ ამას გავყიდით ჭირდება წლები. ამ წლების განმავლობაში რა გინდათ, რომ ჩვენმა ხალხმა იშიმშილოს. იმიტომ რომ ჩვენ დამოკიდებული არ ვიყოთ?" — განაცხადა მან.

მისი თქმით, ბაზრის დივერსიფიკაციას სჭირდება სწორი მართვა და არასწორი დამოკიდებულებაა ის, რომ საქართველოს რუსი ტურისტები არ სჭირდება.

ეს საკითხი საქართველოში კიდევ უფრო აქტუალური გახდა მას შემდეგ, რაც ვლადიმერ პუტინმა თბილისში მიმდინარე საპროტესტო აქციების გამო ტურისტული ემბარგო დააწესა.