ნაციონალური მოძრაობის წევრი, გიორგი კანდელაკი ამბობს, რომ ენმ ვერცერთ თავის მაჟორიტარ კანდიდატს აიძულებს, აუცილებლად მიიღოს არჩევნების მეორე ტურში მონაწილეობა, თუმცა პარტიის საერთო გადაწყვეტილებაა, რომ კანდიდატებმა მეორე ტურშიც იბრძოლონ:

"თუმცა, პარტიის გადაწყვეტილება ყველა მაჟორიტართან მიმართებაში არის სწორედ ამგვარი [რომ მიიღებენ მონაწილეობას]. მიხეილ სააკაშვილი ყოველთვის პატივისცემით ეპყრობოდა ნაციონალური მოძრაობის პოლიტსაბჭოს გადაწყვეტილებას და არანაირი ანტაგონისტური დამოკიდებულების შესახებ სააკაშვილის მხრიდან მე არ მსმენია".

პარტიის წევრი, სერგო რატიანი კი განმარტავს, რომ ზუგდიდის მაჟორიტარობის კანდიდატს, მიხეილ სააკაშვილის მეუღლეს, სანდრა რულოვსს ჯერ არჩევნების პირველი ტური არ დაუმთავრებია და ბუნებრივია, ის პირველივე ტურში მოიგებს.

8 ოქტომბრის არჩევნებთან დაკავშირებით, ექსპრეზიდენტმა, მიხეილ სააკაშვილმა 10 ოქტომბერს განაცხადა, რომ ენმ-ს მაჟორიტარობის კანდიდატებმა არჩევნების მეორე ტურში მონაწილეობა არ უნდა მიიღონ, რადგან, მისივე თქმით, ბიძინა ივანიშვილმა წინასწარ დააანონსა, რომ ქართული ოცნების კანდიდატებს გაამარჯვებინებს.

11 ოქტომბერს ნაციონალური მოძრაობის პოლიტსაბჭოს შემდეგ, რომელზეც გადაწყვიტეს, რომ ენმ შევა პარლამენტში პროპორციული სიით და პარტიის მაჟორიტარები საარჩევნო მეორე ტურში მონაწილეობას მიიღებენ, მიხეილ სააკაშვილს საკითხთან დაკავშირებით კომენტარი ამ დრომდე არ გაუკეთებია.