ნაციონალური მოძრაობის წევრი მაია კალანდია ამტკიცებს, რომ ხაჭაპურის ფესტივალის ჟიურიდან პოლიტიკური მოტივებით მოხსნეს. ამის შესახებ მან ფეისბუქგვერდზე დაწერა.

"ხაჭაპურის ფესტივალის ჟიურიდან რომ ჩაგხსნიან პოლიტიკური მოტივით, ევროპას კი არა მარსსაც აკვირვებ ბიძინიბიძია", — წერს ის.

ინფორმაცია ამის შესახებ გამოცემა LivePress-მა გაავრცელა. გამოცემა წერს, რომ სამეგრელო-ზემო სვანეთის დანიშნულების ადგილის მართვის ორგანიზაციის პროექტების მენეჯერ ედუარდ ფარცვანია პოლიტიკურ მოტივს გამორიცხავს. როგორც მან ლაივპრესს განუცხადა, ჟიურის წევრების განაწილებაზე დამოუკიდებლად იზრუნა იმ ივენთ კომპანიამ, რომელიც ტერიტორიის მოწყობასა და სტუმრების მოწვევაში ეხმარებათ.

"ჩვენგან დამოუკიდებლად ხდება ეს ყველაფერი. პოლიტიკური მოტივი ტურიზმთან, მითუმეტეს გასტრონომიულ ფესტივალთან ცოტა შორს არის", — აღნიშნა ედუარდ ფარცვანიამ.

ხაჭაპურის ფესტივალს 19 ოქტომბერს რუხი უმასპინძლებს.