თეთრი სახლის ინფორმაციით, დიდი შვიდეულის (G7) შემდეგი სამიტი ფლორიდაში, პრეზიდენტ დონალდ ტრამპის კუთვნილ გოლფის კურორტზე ჩატარდება. სამიტი 2020 წლის ივნისში უნდა გაიმართოს.

თეთრის სახლის წარმომადგენლის, მიკ მალვანის განაცხადებით, სამიტიდან პრეზიდენტი რაიმე მოგებას არ მიიღებს. მალვანის თქმით, სამიტის ჩატარებისთვის მათ სხვადასხვა შტატში არაერთი ადგილი მოინახულეს:

"პროცესის ბოლოს ნათელი გახდა, რომ დორალი ამ შეხვედრისთვის საუკეთესი ვარიანტი იყო".

ტრამპის გოლფის კურორტი National Doral Miami მაიამის აეროპორტიდან 13 კილომეტრშია განთავსებული. მაიამიში G7-ის სამიტის ჩატარების შესახებ ტრამპმა ჯერ კიდევ აგვისტოში, მიმდინარე სამიტის დროს განაცხადა. პრეზიდენტმა განაცხადა, რომ გოლფის კურორტს შეუძლია, ნებისმიერ სიტუაციას გაუმკლავდეს და, რაც მთავარია, მაიამის საერთაშორისო აეროპორტიდან რამდენიმე წუთის სავალზეა.