ერთიანი ნაციონალური მოძრაობის პოლიტსაბჭოს სხდომის შემდეგ, პარტიის ლიდერებმა გადაწყვიტეს, რომ ენმ შევა პარლამენტში პროპორციული სიით და პარტიის მაჟორიტარები საარჩევნო მეორე ტურში მონაწილეობას მიიღებენ.

დავით ბაქრაძის განცხადებით, შექმნილ პოლიტიკურ ვითარებაში, მიუხედავად უთანასწორო პირობებისა მათ პარლამენტში შესვლა გადაწყვიტეს:

"ჩვენ გამოვიყენებთ ყველა ტრიბუნას, ჩვენ გამოვიყენებთ პარლამენტს, კანონიერ აქციებს, ჩვენ გამოვიყენებთ ჩვენს კავშირებს უცხოეთში, იმისათვის რომ საქართველო არ გადაიქცეს საბოლოოდ ერთპარტიულ ქვეყანად".

ნაციონალური მოძრაობის პოლიტიკური საბჭოს სხდომა საათნახევრის განმავლობაში გრძელდებოდა. საბჭო სულ 60 წევრისგან შედგება და გადაწყვეტილება ხმათა უმრავლესობით მიიღეს. სხდომა ესწრებოდა ასევე სანდრა რულოვსიც, მიუხედავად იმისა რომ იგი არ არის საბჭოს წევრი.