პარლამენტში პატრიოტთა ალიანსის დეპუტატი, ემზარ კვიციანს ჰგონია, რომ ქვეყანაში პროსტიტუცია, ნარკომოხმარება და აბორტი წახალისებულია. ამის შესახებ დეპუტატმა პარლამენტში სიტყვით გამოსვლისას ისაუბრა.

"უბრალოდ აიღეთ, არასრულწლოვან გოგონას არ აქვს უფლება გათხოვდეს, აი, პროსტიტუცია "პაჟალუსტა", კი ბატონო. აბორტი წახალისებულია, ნარკოტიკები — კი ბატონო. ვერ ხედავთ, რომ ვიღუპებით? შობადობა არ არის სიკვდილიანობა გაზრდილია", — განაცხადა კვიციანმა.

კვიციანამდე ქართული ოცნების დეპუტატმა, ალექსანდრე ერქვანიამ აბორტი სიკვდილის დასჯას შეადარა და თქვა, რომ მსგავსი კანონმდებლობა ცინიზმია, რადგან სახელმწიფო მშობლებს შვილების მკვლელობის უფლებას აძლევს.

ალექსანდრე ერქვანიას აზრით, მუცლად მყოფი ბავშვი ჩასახვის მომენტიდან სრულყოფილი ადამიანია. მისი თქმით, საქართველო დემოგრაფიული კატასტროფის წინაშეა და მსგავსი მიდგომებით ვერ განვვითარდებით.

დეპუტატმა პარლამენტში ქალთა უფლებების შემლახველი განცხადებების გარდა, ჰომოფობიური და ქსენოფობიური მოსაზრებებიც გააჟღერა. მან მამათმავლობად მოიხსენია სექსუალური უმცირესობის წარმომადგენლები, საქართველოს მეზობელ, პარტნიორ ქვეყნებს კი ოკუპანტები უწოდა. პარლამენტის თავმჯდომარემ, ჰომოფობიური შინაარსის მიუხედავად დეპუტატს სიტყვა არ შეაწყვეტინა, დასრულების შემდეგ კი დარბაზში ტაშის ხმაც გაისმა.