ადამიანის უფლებათა კომიტეტის თავმჯდომარე, სოფო კილაძე ამბობს, რომ ქალთა მკვლელობისა და ქალთა მიმართ ძალადობის ფაქტები "წარმოუდგენელ ნიშნულს მიუახლოვდა". ასე გამოეხმაურა კილაძე ხაშურში ქალის მკვლელობის ფაქტს, სადაც ბრალდებული ყოფილი ქმარია.

"ფაქტია, უკვე გამკაცრებული კანონმდებლობა ვერ ახდენს პრევენციას. იმედი მაქვს, რომ ჩვენ მიერ ახლახანს მიღებული პრევენციული კანონი, რომელიც ჯერ არ შესულა ძალაში ბოლომდე, ნაწილობრივ განმუხტავს სიტუაციას. თუმცა, კიდევ არის სასწრაფო ზომები მისაღები", — წერს კილაძე Facebook-ში.

11 ოქტომბერს ხაშურში ქალს მძიმე დაზიანება მიაყენეს და რამდენიმე საათში საავადმყოფოში გარდაიცვალა. ამ საქმეზე მეორე დღესვე დააკავეს ქალის ყოფილი ქმარი. დღეს, 13 ოქტომბერს კი ბრალდებულს პატიმრობა შეეფარდა.