იუსტიციის უმაღლესი საბჭოს წევრი, ანა დოლიძე აცხადებს, რომ სახალხო წევრობაზე დაფუძნებულ ორგანიზაციას ქმნის და გუნდს კრებს. მისი თქმით, მოლაპარაკებები მიმდინარეობს ქართული ოცნების ყოფილ დეპუტატ ლევან კობერიძესთანაც. სხვა პირებს ის არ ასახელებს.

"აქამდე ორგანიზებული ძალის წევრი არ ვიყავი და არ ვთანამშრომლობდი აქტიურად. მივედი ემ ეტაპზე, რომ ვთვლი საჭიროდ რაიმე ორგანიზებული ძალის ნაწილი ვიყო", — აცხადებს ის.

დოლიძე განმარტავს, რომ ის რომელიმე კონკრეტულ პარტიასთან თანამშრომლობას არ გულისხმობს, რადგან არ მოსწონს პიროვნებების კულტი საქართველოში. მაგალითად მას ნაციონალურ მოძრაობაში მიხეილ სააკაშვილის როლი მოჰყავს.

"არამგონია, რომ ჩვენი ქვეყნისთვის კარგი იყოს პიროვნებებზე ასეთი სერიოზული აქცენტი. ეს ისტორიულად იყო პრობლემა ჩვენს შემთხვევაში... მე ამის შეცვლას ვაპირებ ცალსახად. ადამიანები, რომლებიც მოდიოდნენ ხელისუფლებაში არ იყვნენ მოტივირებული, რომ შეექმნათ მექანიზმები, რომლებიც ამ პიროვნებებს შებოჭავდა", — აცხადებს ის.

დოლიძე არ პასუხობს კითხვას იქნება თუ არა ეს ორგანიზაცია პოლიტიკური პარტია. თუმცა, გეგმებსა და სურვილებზე საუბრობს:

"რისი მიღწევა მინდა? ამ ხალხს რომ გავაეთიანებ, მინდა, რომ ავკრძალოთ აზარტული თამაშების რეკლამები ქუჩაში... მინდა, რომ გვქონდეს მეტი მწვანე სივრცე, სტადიონები".