გერმანია სამედიცინო მარიხუანის ლეგალიზაციას 2017 წელს გეგმავს. ამის შესახებ euronews გერმანიის ჯანდაცვის მინისტრის, ჰერმან გროს ინფორმაციაზე დაყრდნობით იუწყება.

მინისტრის განმარტებით, გერმანიის მთავრობას სურს, რომ პაციენტებს შესაძლო საუკეთესო გზით უმკურნალოს. მისივე თქმით, სასურველია, რომ სადაზღვეო კომპანიებმა მკურნალობის ხარჯები დაფარონ.

გამოცემის ინფორმაციით, სამედიცინო მარიხუანა მას შემდეგ გახდა პოპულარული, რაც რიგ შემთხვევებში მისი საშუალებით მკურნალობა წარმატებული აღმოჩნდა. ამის მაგალითებად მას მოჰყავს შიდსის, იმუნოდეფიციტის ვირუსის, C ჰეპატიტისა, გლაოკომასა და პარკინსონის დაავადების მკკურნალობის დროს მარიხუანას გამოყენების შემთხვევები.

აღნიშნულ ინიციატივას შეეწინააღმდეგა გერმანიის ფედერალური ნარკო კომისარი მარლენ მორტლერი, რომელიც მიიჩნევს, რომ მარიხუანა არც ისე უსაფრთხოა ჯანმრთელობისთვის.

ევრონიუსის ცნობით, ევროპაში ჰოლანდია ცნობილია ლიბერალური კანონებით მარიხუანის მოხმარების მიმართ. აშშ-ში, კერძოდ, კოლორადოში, კოლუმბიის ოლქში, ორეგონში, ალასკასა და ვაშინგტონში,მარიხუანის რეკრეაციის მიზნით გამოყენება ნებადართულია. გარდა ამისა, ამერიკის 28 შტატში სამედიცინო მარიხუანას სხვადასხვა ფორმით იყენებენ.