"ლუზერობაზე გამახსენდა — ჩამოთვლა მეზარება და ტაბულას აქვს თავმოყრილი შენი ყველა მარცხი, კომენტარად დაგილინკავ და გადაავლე-ხოლმე თვალი, რომ არ დაგავიწყდეს", — ასე პასუხობს ევროპული საქართველოს დეპუტატი ოთარ კახიძე იუსტიციის მინსიტრ თეა წულუკიანს, რომელმაც ის შეურაცხმყოფელი ტერმინოლოგიით მოიხსენია. პოლიტიკოსებს შორის კამათი იუსტიციის მინისტრის დიპლომის განხილვას მოყვა.

პასუხად კახიძეც შეურაცხმყოფელი ტერმინოლოგიით მოიხსენიებს წულუკიანს და მას "ცრუპენტელას", "უტიფარსა" და "თაღლითს" უწოდებს. დეპუტატი ახსენებს წულუკიანს ვანო მერაბიშვილის საქმეს, ამბობს, რომ ის იტყუება და თავადაც მომზადებას ურჩევს.

"მოემზადე, ლუზერო!" — ასე მიმართა წულუკიანმა კახიძეს, რომელიც ამბობდა, რომ გენერალურ პროკურორად დანიშვნისას წულუკიანს იურისტის დიპლომი არ ჰქონია.

"შენ ისეთი დიდი იურისტი ხარ დიდი დიპლომით, ოთარ, რომ ვანო მერაბიშვილის საქმეზე პირწმინდად დამარცხდი ჩემს წინააღმდეგ სტრასბურგში და იმედად ისღა დაგრჩა, საკნიდან გაიყვანესო, ამ ეპიზოდსღა ეპოტინები. იმას მაინც ვერ იძახი, გაიყვანეს და ცემესო, ანდა გაიყვანეს და აწამესო, ან კიდევ გაიყვანეს და ცოცხით შეურაცხყვესო, და ეს გწყინს, მაგრამ ვერ იტყვი და რას იზამ", — წერს წულუკიანი.

მისივე თქმით, სტრასბურგმა დაადგინა, რომ ვანო მერაბიშვილი პოლიტიკური პატიმარი არაა და მისი დაკავება კანონიერი იყო.

"ახლა, რაღა დაგრჩა აბა. თებერვალში დაუსრულდება მისჯილი სასჯელი მერაბიშვილს და რომ გამოვა, მერე მაინც გასცემ ალბათ პასუხს მას იმის შესახებ, თუ რას ატყუებდი, რაში ვერ და არ დაიცავი და რატომ.

ჰოდა მოემზადე, ლუზერო!" — დაწერა იუსტიციის მინისტრმა.