ქართული ოცნების დეპუტატი, ნინო წილოსანი ამბობს, რომ ძალადობაზე ყველა უნდა დაისაჯოს. ასე გამოეხმაურა ის თბილისის საკრებულოში ქართული ოცნების დეპუტატის, ილია ჯიშკარიანის თანამშრომლის განცხადებას, რომ დეპუტატმა მისი გაუპატიურება სცადა.

წილოსანი იმედს გამოთქვამს, რომ სამართალდამცავი სტრუქტურები რეაგირებას დროულად მოახდენენ.

"ახლა ვუყურე სიუჟეტს... საშინლად მძიმე მოსასმენი იყო თითოეული სიტყვა, რასაც ახალგაზრდა ქალი ყვებოდა მის მიმართ განხორციელებული სექსუალური შევიწროებისა და ძალადობის ფაქტზე. ძალიან ვფრთხილობ, ვინმეს უდანაშაულობის პრეზუმფცია არ დავარღვიო, მაგრამ ძალადობაზე უნდა დაისაჯოს ყველა — განურჩევლად მისი თანამდებობრივი თუ პოლიტიკური კუთვნილებისა... და იმედია სამართალდამცავი სტრუქტურები დროულად განახორციელებენ შესაბამის რეაგირებას", — წერს წილოსანი Facebook-ზე.

თბილისის საკრებულოში ქართული ოცნების დეპუტატის, ილია ჯიშკარიანის თანამშრომელი მას სექსუალურ და ფიზიკურ ძალადობაში ადანაშაულებს. ძალადობის სავარაუდო მსხვერპლი მთავარ არხთან ყვება, რომ ჯიშკარიანმა სექსუალური ძალადობა სცადა, როცა გაქცევა მოახერხა, შემდეგ ფიზიკურად იძალადა.