შვიდთვიანი პროტესტის შემდეგ ჰონგ-კონგში ნიღბების ტარება იკრძალება. როგორც ჰონგ-კონგის ლიდერმა, კერი ლემმა განაცხადა, ავტონომიურ რეგიონში საგანგებო რეჟიმი გამოაცხადეს. ნიღბებზე აკრძალვა 5 ოქტომბრიდან შევა ძალაში.

აღნიშნული გადაწყვეტილება მას შემდეგ განაცხადეს, რაც პირველ ოქტომბერს, ჩინეთის სახალხო რესპუბლიკის 70 წლისთავზე მასობრივი არეულობა იყო. კერი ლემის თქმით, "ძალადობა ქალაქს ანადგურებს" და ხელისუფლებას არ შეუძლია სიტუაცია უარესობისკენ წაიყვანოს.

რამდენიმე თვეა ჰონგ-კონგში საპროტესტო მუხტი არ ნელდება. მოსახლეობის მასობრივი უკმაყოფილება საექსტრადიციო კანონმა გამოიწვია. წარმოდგენილი პროექტი ითვალისწინებს აღმასრულებელი ხელისუფლების გადაწყვეტილებით ბრალდებულების გადაცემას ნებისმიერი იურისდიქციისთვის, რომელთანაც არ აქვს ექსტრადიციის შესახებ შეთანხმება, მათ შორის ჩინეთისთვის.

ხელისუფლება დათმობაზე წავიდა და საექსტრადიციო კანონი პარლამენტიდან გაიწვია, თუმცა მოქალაქეები ამჯერად ჰონგ-კონგის ლიდერის, კერი ლამის გადადგომას ითხოვენ.

ჰონგ-კონგს დიდი ბრიტანეთის კოლონიის სტატუსი 1997 წელს ჩამოერთვა და ჩინეთის შემადგენლობაში იმ პირობით შევიდა, რომ ფართო ავტონომია ექნებოდა, გარდა თავდაცვითი და საგარეო საკითხებისა, ის დამოუკიდებლად მიიღებდა გადაწყვეტილებებს.

მაშინდელი ლიდერები საზოგადოებას დაჰპირდნენ, რომ ჰონგ-კონგი, მაკაო და შეერთების შემთხვევაში ტაივანი, შეინარჩუნებდა პრინციპს — ერთი ქვეყანა, ორი სისტემა.

ამავე თემაზე: