პოლიტიკური მოძრაობა გირჩი ტაქსების რეგულაციის წინააღმდეგ გამოდის და TAXI-ს ნიშნის ნაცვლად შმAXI წარადგინა. გირჩში ამბობენ, რომ აღნიშნულ პროექტს საგანმანათლებლო ფუნქცია აქვს.

პრეზენტაცია წიწამურთან, ილია ჭავჭავაძის ძეგლის წინ გაიმართა. პარტიის ლიდერის, ზურაბ ჯაფარიძის თქმით, ჭავჭავაძის ძეგლთან შეკრება სიმბოლურია:

"დაახლოებით, საუკუნე-ნახევრის წინ წიწამურთან მოკლეს ეს კაცი. ჩვენი აზრით, ამ ქვეყანაში ამ კაცთან ერთად საღი აზრი მოკლეს. ჭავჭავაძე იყო ადამიანი, რომელიც ამ ერს მორალს სწორად უკითხავდა. ჩვენი აზრით, გირჩიც, რაღაც თვალსაზრისით, არის ამის გამგრძელებელი".

მისივე განმარტებით, ჩვენი საზოგადოება "არასწორი მორალით ცხოვრობს", რის გამოც გვაქვს არასწორი რეგულაციები და ერთ-ერთი გამოვლინება სწორედ ტაქსების რეგულაციაა.

"თბილისის მერიამ უმუშევრად დატოვა ათობით ათასი ადამიანი და გადავწყვიტეთ, რომ გაგვეშვა, ჩვენი აზრით, საკმაოდ მასშტაბური პროექტი, რომელის იქნება, ასევე, იქნება საგანმანათლებლო. ეს იქნება ბორბლებზე მოძრავი უნივერსიტეტი. ანუ ბევრი ადამიანი გაშლილი დედაქალაქში, რომელიც ავრცელებს სწორ მორალს".

როგორც ჯაფარიძე აცხადებს, მათ დააფუძნეს კომპანია შმAXI, რომელიც დაიქირავებს მასწავლებლებს. ეს მასწავლებლები თბილისში მგზავრებს ჩაისვამენ და მათ ინფორმაციას მიაწვდიან.

"თითოეულ ადამიანს, რომელიც ტაქსაობით ირჩენდა თავს და მერიამ დატოვა უმუშევარი, კომპანია შმAXI სთავაზობს მათ, შეეშვან ტაქსაობას და იშმაქსაონ. თუ მათ არ ჰყოფნით თავდაჯერებულობა, რომ შეძლებენ მოსახლეობაში გირჩის იდეების სწორად გავრცელებას, ნებისმიერ ციფრულ ფორმატში მივაწვდით ჩვენს საგანმანათლებლო ვიდეოებს, რომელიც გვაქვს ასეულობით".

რაც შეეხება ანაზღაურებას ჯაფარიძე ამბობს, რომ სერვისის ანაზღაურება მოხდება არა მანძილის გავლის მიხედვით, არამედ იმის მიხედვით, რამხელა საგანმანათლებლო მასალას მოასმენინებენ მგზავრებს.