"აფხაზეთში და ე.წ. სამხრეთ ოსეთში სიცოცხლის, ჯანმრთელობის დაცვის, განათლებისა და გადაადგილების უფლებების დარღვევა გრძელდება" - ამის შესახებ სახალხო დამცველმა, უჩა ნანუაშვილმა დღეს, 6 მაისს, ადამიანის უფლებათა დაცვისა და სამოქალაქო ინტეგრაციის კომიტეტზე განაცხადა.

ომბუდსმენის თქმით, ეთნიკური ნიშნით დისკრიმინაციისა და თავისუფლების უკანონოდ აღკვეთის ფაქტებს რეგულარული ხასიათი აქვს:

"ოფიციალური ინფორმაციით, 2015 წელს ე.წ. სამხრეთ ოსეთის გამყოფ საოკუპაციო ხაზზე 163 ადამიანი დააკავეს, 2014 წელს ეს მაჩვენებელი 142 იყო. 2015 წელს აფხაზეთის მიმართულებით, დაკავების 341 შემთხვევა გამოვლინდა, ეს მონაცემები 2014 წელს 380-ს შეადგენდა".

ნანუაშვილმა აღნიშნა, რომ აფხაზეთის საოკუპაციო გამყოფ ხაზთან დაკავებების მაჩვენებელი ამ სტატისტიკურ მონაცემებზე მაღალია გალის მოსახლეობის ხარჯზე, თუმცა მათ აღრიცხვას საქართველოს სახელმწიფო უსაფრთხოების სამსახური ვერ ახერხებს:

"აფხაზური და რუსული წყაროების მიხედვით, ეს პრობლემა [საოკუპაციო ხაზზე დაკავებები] გალელი მოსახლეობიდან 2,400 კაცს შეეხო".

ნანუაშვილის განმარტებით, ოკუპირებულ ტერიტორიებზე მიმდინარე სამხედრო წვრთნები გამყოფი ხაზის სოფლის მკვიდრთათვის უსაფრთხოების პრობლემას წარმოადგენს. მისი თქმით, კონფლიქტით დაზარალებული მოსახლეობის ერთ-ერთ უმთავრეს პრობლემად შემოსავლის წყაროს მოძიებაც რჩება:

"მავთულხლართების გავლებისა და სარწყავი წყლის გადაკეტვის გამო მოსახლეობა ვეღარ მისდევს მისთვის ტრადიციულ სასოფლო სამეურნეო საქმიანობას".

ომბუდსმენის აპარატი აქტიურად აკვირდება ოკუპირებულ ტერიტორიებზე და საოკუპაციო ხაზის სიახლოვეს მცხოვრები მოსახლეობის უფლებებს. მისივე თქმით, დაფიქსირდა ჩვილი ბავშვების, მშობლების, სკოლის მოსწავლეების, პაციენტებისა და ხანდაზმულების უკანონო დაკავების ფაქტებიც.