საგანგებო სიტუაციების მართვის სამსახურის განცხადებით, ე.წ. თერგის ბაზრობაზე ხანძარი სრულად ლიკვიდირებულია. ცეცხლი დღეს, 2 ოქტომბერს დილით ადრე გაჩნდა.

უწყების განმარტებით, ხანძარი შერეულ სასაწყობო ტერიტორიაზე, დაახლოებით, 200მ2 ფართობზე იყო გავრცელებული. ადგილზე მუშაობდა 80-მდე მეხანძრე-მაშველი. მობილიზებული იყო ყველა შესაბამისი ხანძარსაწინააღმდეგო ტექნიკა.

მომხდარზე გამოძიება საქართველოს სისხლის სამართლის კოექსის 187-ე მუხლის მე-2 ნაწილით მიმდინარეობს, რაც ცეცხლის წაკიდებით ნივთის დაზიანებას ან განადგურებას გულისხმობს.

თერგის სავაჭრო ცენტრში ხანძარი 2018 წლის თებერვალშიც იყო. მაშინ 3000 მ2-მდე ტერიტორია დაიწვა. შენობის მესამე სართულზე ხანძარი 27 თებერვალს, შუაღამით გაჩნდა. ცეცხლს 30-ზე მეტი სახანძრო-სამაშველო ჯგუფი აქრობდა. სავაჭრო ცენტრში განთავსებული იყო მეორადი ტანსაცმლის მაღაზიები. ასევე, იყიდებოდა თამბაქოს ნაწარმი და სასურსათო პროდუქცია.