ევროპული საქართველო აცხადებს, რომ თბილისში ტაქსების რეგულაციის რეფორმა ჩაშლილია და მის გაუქმებას ითხოვს. აღნიშნული განცხადება პარტიის ოფისში გიორგი გაბაშვილმა და გიორგი კანდელაკმა გააკეთეს.

"მერიას ჩვენ ვაფრთხილებდით, რომ ტაქსების რეგულაცია გამოიწვევდა სამუშაო ადგილების დაკარგვას. ეს ცრუ რეფორმა არის ჩაშლილი. საინტერესოა, რას ეუბნება თბილისის მერია 30 ათასზე მეტ ტაქსის მძღოლს, რომელიც თავად აღრიცხა, რატომ არ აქვთ უფლება ფერად ტაქსებს ქუჩაში აიყვანონ მგზავრი, რატომ უნდა დარჩნენ მათი ოჯახები შემოსავლების გარეშე და რატომ განახორციელეს საერთოდ რეფორმა, რომლის შედეგიც არის სამი და სამივე არის კატასტროფულად ცუდი", — განაცხადა გაბაშვილმა.

მისივე თქმით, თბილისის მერიის მიერ გადადგმული ნაბიჯები გაუაზრებელი იყო, რომელიც "ადამიანის სიღარიბეზეა ორიენტირებული". გიორგი კანდელაკის განმარტებით, ევროპული საქართველო პარლამენტში და საკრებულოში აფრთხილებდა მერიას, რომ ტაქსების რეგულაციები არ აემოქმედებინათ:

"არ მახსენდება ამ მასშტაბით ჩაძვრომა ჩვენი მშრომელების ჯიბეში... ეს მავნებლური რეგულაციები ერთის მხრივ, აძვირებს მგზავრობას, მეორეს მხრივ კი, გაზრდის უმუშევრობა".

პირველი ოქტომბრიდან თეთრი ფერის ტაქსების რეგულაცია ძალაში შევიდა. თბილისის მერიის ახალი რეგულაციით, ტაქსის მომსახურებას კლიენტებს ვეღარ გაუწევენ სამკარიანი და მარჯვენასაჭიანი ავტომობილები. გარდა ამისა, ტაქსით მომსახურების შესაბამისი ლიცენზიის გარეშე განხორციელება 200 ლარით ჯარიმდება.

მერიის რეფორმებს ტაქსის მძღოლების აქციები მოჰყვა, ისინი ამბობდნენ, რომ თეთრად გადაღებვის შემთხვევაში ხარჯი მერიის მიერ გადაცემული ვაუჩერით სრულად ვერ იფარებოდა. გარდა ამისა, მათი განმარტებით, გადაღებილი მანქანის ფასი გადაუღებავთან შედარებით დაბალია. ამის შემდეგ მერიამ მძღოლებს გადაღების ნაცვლად ფირის გადაკვრა შესთავაზა.