მას შემდეგ, რაც 16 წლის აქტივისტი გრეტა თუნბერგი გაეროში სიტყვით გამოვიდა, მის შესახებ საუბარი ერთი წამითაც არ შემწყდარა.

"როგორც ჩანს, ის ძალიან ბედნიერი ახალგაზრდა გოგოა, რომელიც ნათელ მომავალზე ფიქრობს. როგორი სასიამოვნო სანახავია!", — დაწერა ტრამპმა ტვიტერზე.

კლიმატის ცვლილებების მიმართ სკეპტიკურად განწყობილი პრეზიდენტის სიტყვები კი გრეტამ ტვიტერის აღწერაში დაიმატა.

გრეტამ საკუთარ გამოსვლაში პლანეტის მომავალზე პასუხისმგებლობა ყველა იმ ადამიანს დააკისრა, ვინც სხდომას ესწრებოდა. მისი აზრით, პოლიტიკოსები საკმარისს არ აკეთებენ იმისთვის, რომ რეალური ცვლილებები დავინახოთ. Top Gear-ის ყოფილი წამყვანის, ჯერემი კლარკსონის აზრით კი, თინეიჯერმა გრეტამ უნდა გადაიაზროს ყველაფერი, რაც მას წინა თაობებმა მისცეს.

"ჩვენ მოგეცით მობილური ტელეფონები, ლეპტოპები და ინტერნეტი. ჩვენ შევქმენით სოციალური მედია, რომელსაც ყოველდღიურად იყენებ და ჩვენ გამოვყავით ამისათვის ფინანსები. გათამამებულო ბავშვო, როგორ ბედავ და ლექციებს გვიკითხავ", — განაცხადა BBC-ის ყოფილმა წამყვანმა.

"როგორ ბედავ, რომ აშშ-ში იახტით მოცურავ, რომლის აგებაც ის 15 მილიონი ფუნტი დაჯდა, რომელიც შენ არ გამოგიმუშავებია და რომელსაც სარეზერვოდ დიზელის ძრავიც ჰქონდა, რომელიც არ გიხსენებია", - თქვა ტელეწამყვანმა The Sun-თან, - "ცოტა ხნით დაფიქრდი, რა მშვიდად გძინავს ღამით, როცა იცი, რომ უფროსები შვედეთის სამხედრო თვიმფრინავებს აგებენ და აუმჯობესებენ იმისთვის, რომ შენ იყო უსაფრთხოდ".

კლარკსონს კლიმატურ ცვლილებებში ეჭვი არ შეაქვს. მისი აზრით, პლანეტა ნამდვილად საფრთხის ქვეშაა და რაიმე უნდა მოხერხდეს, სანამ წარმოუდგენელი კრიზისის წინაშე აღმოვჩნდებით. ამის მიუხედავად, მისი აზრით, გრეტა სკოლაში უნდა დაბრუნდეს და უკეთ მოუსმინოს საბუნებისმეტყველო საგნებს.

"საბოლოოდ ამ პრობლემებს მეცნიერება გადაჭრის და არა მოღუშვა და ყოველ ხუთ წუთში ბრალდებების სროლა. ათასობით ადამიანი, რომელსაც ბრალი დასდე, სწორედ იმის გაკეთებას ცდილობს ყოველდღიურად, რაც შენ გინდა", - მიმართავს კლარკსონი თუნბერგს, - "ასე რომ, კარგი გოგო იყავი, კეთილი ინებე და სკოლაში დაბრუნდი".

გრეტას გამოსვლა გაეროში:

"ეს ყველაფერი არასწორია. მე აქ არ უნდა ვიყო, სკოლაში გაკვეთილებს უნდა ვესწრებოდე. თქვენი ფუჭი საუბრით მომავალი და ბავშვობა წამართვით. მასობრივი გადაშენება იწყება, მაგრამ ერთადერთი რაზეც საუბრობთ, ფული და ზღაპრებია უსასრულო ეკონომიკურ ზრდაზე. როგორ ბედავთ!"

აღსანიშნავია, რომ ჯერემი კლარკსონი 2002 წლიდან გადაცემა Top Gear-ის წამყვანი იყო. თუმცა, 2015 წელს, მას შემდეგ, რაც კლარკსონმა ერთ-ერთ პროდიუსერს შეურაცხყოფა მიაყენა, BBC-იმ ის სამსახურიდან გაუშვა.