ნაციონალური მოძრაობის დეპუტატი, თინა ბოკუჩავა პარლამენტის გენდერულ საბჭოს მიმართავს ეკა ბესელიას მხარდაჭერის მოთხოვნით. დღეს, 26 სექტემბრის სხდომაზე ვანო ზარდიაშვილმა მოსამართლე მირანდა ერემაძის მოსმენის დროს ახსენა სიტყვები "ბესელიას მორალი", რის გამოც ეკა ბესელია მას ხელით შეეხო. თინა ბოკუჩავამ კომიტეტის თავმჯდომარეს, ანრი ოხანაშვილს მიმართა, რომ ეთიკის საბჭოს გარდა, ეს საკითხი გენდერულმა საბჭომაც უნდა განიხილოს:

"ისეთი ფსიქოლოგიური ტერორის მსხვერპლი, როგორიც იყო და დღესაც გახდა ქალბატონი ეკა, ყველაზე ხშირ შემთხვევაში არიან ხოლმე ქალები. როგორც მინიმუმ, აქ მჯდომმა ქალმა პარლამენტის წევრებმა უნდა დააფიქსირონ თავიანთი აღშფოთება მომხდარზე, გამოუცხადონ სოლიდარობა ქალ პარლამენტის წევრს, პოლიტიკოსს რომ სხვა ქალებს არ შეეშინდეთ პოლიტიკური საქმიანობა".

თინა ბოკუჩავამ სხდომაზე განაცხადა, რომ ბიძინა ივანიშვილი იყენებს "ბინძურ მეთოდებს", რათა ებრძოლოს განსხვავებულ აზრს, თუნდაც ყოფილი თანაგუნდელების მიმართ.

ანრი ოხანაშვილმა სხდომაზევე უპასუხა დეპუტატის ინიციატივას, რომ ეს საკითხი უნდა განიხილოს, მათ შორის, გენდერულმა საბჭომ და მიიღოს გადაწყვეტილება.

ეკა ბესელია ამბობს, რომ კომიტეტში გასაუბრებაზე მყოფ უზენაესი სასამართლოს მოსამართეობის კანდიდატ მირანდა ერემაძეს, რომელიც "კლანის რჩეულია" დეპუტატებმა რთული კითხვები დაუსვეს, ვანო ზარდიაშვილი კი მის "გადასარჩენად" მიუშვეს.

ბესელიას თქმით, მან ზარდიაშვილის "პროვოკაციას გასცა პასუხი" და ბოდიშის მოხდას არ აპირებს. მისი თქმით, ყველა ვინც "ასე მოიქცევა, იგივე პასუხს მიიღებს".

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.