უზენაესი სასამართლოს მოსამართლეობის კანდიდატი, შოთა გეწაძე ამბობს, რომ ნარკომომხმარებელი იმ შემთხვევაში უნდა დაისაჯოს, თუ ის საფრთხეს უქმნის საზოგადოებას. ამის შესახებ მან კომიტეტის სხდომაზე კოალიცია დამოუკიდებელი და გამჭვირვალე მართლმსაჯულებისთვის წარმომადგენლის კითხვაზე პასუხის გაცემის დროს განაცხადა.

"თუკი ნარკოტიკულ საშუალებებს ბევრჯერ ვიყენებ, ბოროტად ვიყენებ და მივედი იმ კონდიციამდე, რომ საზოგადოებას ვუქმნი საფრთხეს. პირადი მოხმარებისთვის ვიყენებ, მაგრამ უკვე ისეთი ფორმა მიიღო, რომ "ლომკა" გამოიწვია, ასეთ დროს, მე ბევრჯერ მსმენია, ადამიანები ჩადიან დანაშაულს, ოღონდ დაიკმაყოფილონ ეს მოთხოვნილება. ქურდობა, ყაჩაღობა, ძარცვა — სხვა კრიმინალურ აქტივობებს იწვევს მომხმარებელი ადამიანის ამ კონდიციამდე მისვლა", — თქვა გეწაძემ.

კოალიციის წარმომადგენელმა, გიორგი მშვენიერაძემ გეწაძეს დამაზუსტებელი კითხვა დაუსვა, მომხრე იყო, თუ არა ნარკომომხმარებლის იმ დრომდე დაკავების, ვიდრე ის დანაშაულს ჩაიდენდა.

"ძალიან რთულია მაგის მიხვედრა, რომ ვიღაც ხვალ აპირებს დანაშაულის ჩადენას..." — განმარტა გეწაძემ.

შოთა გეწაძე ერთ-ერთია იმ მოსამართლეებს შორის, რომელსაც პარლამენტმა უზენაეს სასამართლოში განსამწესებლად კენჭი უნდა უყაროს. მისი გადაწყვეტილებით ჩამოერთვა ბიძინა ივანიშვილს საქართველოს მოქალაქეობა პოლიტიკური აქტივობის დაწყებაზე განაცხადიდან მალევე. გეწაძე იყო იმ კოლეგიაში, რომელმაც არ დააკმაყოფილა დაღესტნელი აქტივისტის, მიკაილ კადიევის თხოვნა საქართველოში ლტოლვილის სტატუსის მიღებაზე.