უზენაესი სასამართლოს მოსამართლეობის კანდიდატი, შოთა გეწაძე ფიქრობს, რომ ნაციონალური მოძრაობის ხელისუფლებას ავტორიტარიზმის ნიშნები ჰქონდა. ასე უპასუხა მოსამართლეობის კანდიდატმა დამოუკიდებელი დეპუტატის ბექა ნაცვლიშვილის კითხვას, ავტორიტარული იყო თუ დემოკრატიული ნაციონალური მოძრაობის ხელისუფლება.

"მესამე ვარიანტი არ არსებობს? ამ მმართველობას... პოლიტიკური შეფასებების გაკეთება მიწევს...კარგი გავაკეთებ მაინც განმარტებას, და ვფიქრობ რომ ამ მმართველობას ბევრი პრობლემა ჰქონდა და ავტორიტარიზმის ნიშნები და ფაქტები აქ იყო. ვიცნობ, ბევრ ავტორიტარული მმართველობის ტიპებს, პრობლემები იყო ავტორიტარიზმისკენ გადახრილი და მე ეს ვიგრძენი", — განაცხადა მოსამართლეობის კანდიდატმა.

დეპუტატ, ბექა ნაცვლიშვილის კითხვა დამოუკიდებელმა დეპუტატმა ლევან გოგიჩაიშვილმა გააგრძელა. ის დაინტერესდა, როგორ წარმოუდგენია მოსამართლეობის კანდიდატს, ქვეყანა იყოს ავტორიტარული და სასამართლო არ კონტროლდებოდეს და მსგავსი ქვეყნის მაგალითის დასახელება მოითხოვა.

შოთა გეწაძის თქმით, ის კონკრეტულ ქვეყანას ვერ დაასახელებს და კიდევ ერთხელ გაიმეორა, რომ არა აბსოლუტურ ავტორიტარიზმს, არამედ ავტორიტარიზმის ნიშნებს ხედავდა.

ლევან გოგიჩაიშვილს წარმოუდგენლად მიაჩნია ქვეყანა იყოს ავტორიტარული სასამართლოს კონტროლის გარეშე. მისი თქმით, მოსამართლეობის კანდიდატის შეფასებები ურთიერთგამომრიცხავია და ასეთი დამოკიდებულების გამო, შესაძლოა, მხარი არ დაუჭირონ.

"ეს ერთმანეთთან იმდენად შეუთავსებელია, რომ სასამართლო დამოუკიდებელია, ხოლო ქვეყანას ავტორიტარული ნიშნები აქვს. დამიტოვეთ უფლება იმის თქმის, რომ ძალიან შეუთავსებელი განცხადება. არ არსებობს სახელმწიფო, რომელიც არის ავტორიტარული, ხოლო სასამართლო დამოუკიდებელი, ეს არის ნონსენსი", — თქვა ლევან გოგიჩაიშვილმა