უზენაესი მოსამართლეობის კანდიდატი, შოთა გეწაძე ამბობს, რომ დაღესტნელი აქტივისტი მიკაილ კადიევი იბრალებდა პოლიტიკურ აქტივობას. ამის შესახებ ამ საქმის განმხილველმა ერთ-ერთმა მოსამართლემ კომიტეტის სხდომაზე გასაუბრების დროს თქვა.

"საქმის მასალების თანახმად ოდნავადაც არ იკვეთებოდა მისი პოლიტიკური საქმიანობა. ჩემი აზრით, იგი იბრალებდა პოლიტიკურ აქტივობას თავშესაფრის მოთხოვნის მიზნით. ჩვენ ეს არ გამოგვეპარა", — თქვა გეწაძემ.

მისი განმარტებით, ამ გარემოებების გათვალისწინებით, მოსამართლეები მივიდნენ დასკვნამდე, რომ კადიევს საქართველოში თავშესაფარი არ ეკუთვნოდა.

კითხვაზე, რუსეთში არსებული მდგომარეობის გათვალისწინების მიუხედავად, რატომ არ მიიღეს მოსამართლეებმა კადიევისთვის თავშესაფრის მიცემის გადაწყვეტილება, უზენაესის მოსამართლეობის კანდიდატმა ასე უპასუხა:

"რაც შეეხება საპატიმრო დაწესებულებას. იქ არსებულმა მდგომარეობამ და ინდივიდუალურმა გარემოებებმა უნდა მიაღწიოს იმ ზღვარს, რომ ამაში დარწმუნდეს მოსამართლე. ამ ზღვრამდე ვერ მივედით."

კადიევი საქართველოში წითელი ხიდის გავლით 2011 წელს შემოვიდა. ის ქვეყნისგან ლტოლვილის სტატუსის მინიჭებას ითხოვდა. 2017 წელს კი სააპელაციო სასამართლოს კოლეგიამ, რომლის შემადგენლობაშიც შოთა გეწაძეც იყო, კადიევს უარი უთხრეს ამ სტატუსის მინიჭებაზე. ადვოკატი მალხაზ პატარაია აცხადებდა, რომ სააპელაციო სასამართლომ კადიევი რუსეთის ხელისუფლებისთვის გადასაცემად გაწირა.