რეპორტიორები საზღვრებს გარეშე ეხმაურება აზერბაიჯანელი ჟურნალისტის, აფგან მუხტარლის მდგომარეობას ციხეში და "ღრმად შემაშფოთებელს" უწოდებს. 22 სექტემბერს მუხტარლიმ დიაბეტის მიუხედავად შიმშილობა დაიწყო, რათა ციხის ადმინისტრაციის მხრიდან მის მიმართ თვითნებური მოპყრობა გაეპროტესტებინა.

რეპორტიორები საზღვრებს გარეშე მუხტარლის ბედზე პასუხისმგებლობას აზერბაიჯანის ხელისუფლებას აკისრებს. ორგანიზაცია მოუწეოდებს საერთაშორისო საზოგადოებას, ზეწოლა მოახდინონ მთავრობაზე, რათა დაუყოვნებლივ გაათავისუფლონ მუხტარლი.

"მან იცის, რომ ეს შიმშილობა მის სიცოცხლეს საფრთხეში აგდებს. მან ეს გადაწყვეტილება მაინც მიიღო, რადგან სასამართლო პროცესები უიმედოა. ერთადერთი რეაგირება რაც ციხის ადმინისტრაციას ჰქონდა, ის არის რომ აფგანი სამარტოო საკანში გადაიყვანეს", — ამბობს ლეილა მუსტაფაევა.

თბილისიდან 2017 წლის 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს.

მუხტარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხტარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო. საქმეზე გამოძიება საქართველოში ამ დრომდე მიმდინარეობს.