პარლამენტის თავმჯდომარე, არჩილ თალაკვაძე ამბობს, რომ მისთვის პოლიციელის მკვლელის შეწყალება მიუღებელია. გადაცემა რეაქციაში თალაკვაძემ აღნიშნა, რომ შეწყალება პრეზიდენტის დისკრეციული უფლებაა და მოქალაქეებს უფლება აქვთ მას არ დაეთანხმონ.

პრეზიდენტმა სალომე ზურაბიშვილმა შეიწყალა კაცი, რომელმაც ბათუმში პოლიციელი თარაშ მუკბანიანი მოკლა. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

პრეზიდენტის გადაწყვეტილებას კრიტიკით შეხვდნენ ოპოზიციის წარმომადგენლები. ამასთანავე, რამაზ დევაძის შეწყალება მიუღებელი აღმოჩნდა მმართველი პარტიის რამდენიმე დეპუტატისთვის. ევროპასთან ინტეგრაციის კომიტეტის თავმჯდომარის, თამარ ხულორდავას განცხადებით, პოლიციელის მკვლელობაში მსჯავრდებულის შეწყალება გაუგებარია. ხოლო ფრაქცია ქართული ოცნების თავმჯდომარემ, მამუკა მდინარაძემ პრეზიდენტის მიერ რამაზ დევაძის შეწყალებას მიუღებელი უწოდა.

თვითონ სალომე ზურაბიშვილმა გადაწყვეტილების განმარტებაზე უარი განაცხადა. მისი განცხადებით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა ზურაბიშვილმა.