საქართველოს პარლამენტის 2019 წლის საშემოდგომო სესია პლენარული სხდომით ოფიციალურად გაიხსნა. სესიის ფარგლებში პარლამენტარებს არაერთი მნიშვნელოვანი და სადავო საკითხი აქვთ განსახილველი. მათ მიმდინარე კვირაში მთავრობის ახალ შემადგენლობასა და სამთავრობო პროგრამას უნდა მოუსმინონ და კენჭი უყარონ.

სესიის პარალელურად მოძრაობა #სირცხვილიას წევრები საპროტესტრო აქციას მართავენ და პრემიერ-მინისტრის პოსტზე გიორგი გახარიას კანდიდატურას აპროტესტებენ. პარლამენტის შესასვლელთან პოლიციასა და აქციის მონაწილეებს შორის დაპირისპირებაც იყო. ევროპული საქართველოს დეპუტატებმა #სირცხვილიას წევრებზე პარლამენტის საშვი დაუშვეს, ამის მიუხედავად პოლიცია მათ შენობაში არ უშვებს და ტექნიკური გაუმართაობით ხსნის.

სესიის ფარგლებში განიხილავენ საკონსტიტუციო ცვლილებებს, რომლის მიხედვითაც 2020 წელს არჩევნები პროპორციული სისტემით უნდა ჩატარდეს. დადგენილების პროექტით განსაზღვრულია კომისიის შემადგენლობა, რომელიც 13 წევრით უნდა დაკომპლექტდეს.

საშემოდგომო სესიის ფარგლებში, საკანონმდებლო ორგანოს რამდენიმე მნიშვნელოვანი საკადრო გადაწყვეტილების მიღება მოუწევს, მათ შორის, უზენაესი სასამართლოს მოსამართლეობის კანდიდატებს უნდა მოუსმინოს და 20 მოსამართლე აირჩიოს. ამასთან, პარლამენტმა ის წლიური ანგარიშებიც უნდა მოისმინოს, რომლის განხილვაც საგაზაფხულო სესიაზე გადაიდო. მათ შორის არის სახალხო დამცველის, გენერალური პროკურორისა და აუდიტის სამსახურის წლიური ანგარიშები.