ყოფილმა პრემიერ-მინისტრმა, მამუკა ბახტაძემ თავის გამოსამშვიდობებელ ფეისბუქპოსტში არაერთ საკითხზე გაამახვილა ყურადღება, მათ შორის, ეკონომიკურ განვითარებაზე, ჭარბვალიანობასა და განათლების კონცეფციაზე. ამასთანავე, ბახტაძემ მადლიერება გამოხატა რამდენიმე ადამიანისა და ჯგუფის მიმართ.

2012 წლის არჩევნების "ახალი შესაძლებლობებისთვის" მან მადლობა გადაუხადა ქართული ოცნების დამფუძნებელს ბიძინა ივანიშვილს.

"ამ გამარჯვების სულისჩამდგმელი იყო პარტია ქართული ოცნების დამფუძნებელი − ბიძინა ივანიშვილი და მსურს, გადავუხადო განსაკუთრებული მადლობა მას და ჩვენი პოლიტიკური გუნდის ყველა წევრს იმ მხარდაჭერისა და ნდობისთვის, რომელსაც მე ყოველთვის ვგრძნობდი", — დაწერა ფეისბუქზე ბახტაძემ.

გარდა ამისა, 600 ათასი ადამიანის სესხის განულებისთვის ყოფილმა პრემიერმა მადლობა გადაუხადა ფონდ ქართუს.

უკვე ყოფილმა პრემიერმა მადლობა გადაუხადა თავის წინამორბედებს და წარმატება უსურვა თავის მემკვიდრეს. ამასთანავე, მან მადლობა გადაუხადა სახელმწიფო უწყებების თანამშრომლებს, სამოქალაქო საზოგადოებას, კერძო სექტორსა საერთაშორისო პარტნიორებს.

და ბოლოს, მამუკა ბახტაძემ მადლობა გადაუხადა ქართულ საზოგადოებას:

"თქვენი მხარდაჭერა, რჩევები, კრიტიკა ჩემთვის იყო და არის მთავარი მამოძრავებელი იმპულსი ქვეყნის მშენებლობის საქმეში".

ამავე თემაზე: