ანტისაოკუპაციო მოძრაობის ძალა ერთობაშია ლიდერი, დავით ქაცარავა აცხადებს, რომ ოსური დრონი მოძრაობის წევრებმა ჩამოაგდეს. ამის შესახებ ის Facebook-ზე წერს.

მისი ინფორმაციით, დრონმა საოკუპაციო ხაზი გადმოკვეთა და საქართველოს მთავრობის მიერ კონტროლირებად საჰაერო სივრცეში გადმოვიდა.

"ჩვენმა ჯგუფმა მოახერხა ამ დრონის განეიტრალება და ეს დრონი ჩამოვარდა ჩვენს კონტროლირებად ტერიტორიაზე. ცოტა ხანში რუსოსებმა ატეხეს პანიკა, მალევე გამოცხადდა ჩვენი პოლიცია და წაგვართვა დრონი. საინტერესოა, ეგ რას უნდა მივაწეროთ? ისევ არ ვაღიზიანებთ რუსებს?" — წერს ქაცარავა.

სახელმწიფო უსაფრთხოების სამსახურში ამბობენ, რომ ქარელის მუნიციპალიტეტში, სოფელ აბანოს ტერიტორიაზე საოკუპაციო ძალების დრონი სამოქალაქო პირის დრონს შეეჯახა, რის გამოც ორივე დაზიანდა და ჩამოვარდა.

დღეს, პირველ სექტემბერს დე ფაქტო ცხინვალმა გაავრცელა ინფორმაცია, რომ სოფელ კობის მხრიდან მათი მიმართულებით უპილოტო საფრენ აპარატს ესროლეს. მათივე თქმით, დრონისთვის ცეცხლის გახსნა ქართული მხარისგან პირდაპირი პროვოკაციაა.