ახალგაზრდა იურისტთა ასოციაციის თავმჯდომარემ, ანა ნაცვლიშვილმა საპარლამენტო არჩევნებზე მომხდარ დარღვევებზე მედიაცენტრში ისაუბრა. მისი თქმით ზოგადად უბნები დროულად გაიხსნა და აღჭურვილი იყო შესაბამისი მასალით, თუმცა დარღვევები იყო წილისყრის პროცედურებთან დაკავშირებით.

"გამოვლინდა რამდენიმე შემთხვევა, როგორც თბილისში ასევე საქართველოს რეგიონებში, როდესაც გადასატანი ყუთის წამღები კომისიის წევრების გამოსავლენად წილისყრაში მონაწილეობაზე უარი განაცხადეს ერთიანი ნაციონალური მოძრაობის წევრებმა. ჩვენი შეფასებით, ეს წარმოადგენს კომისიის წევრის მოვალეობის არასათანადოდ შესრულებას და ჩვენ დავწერეთ საჩივრები. მიგვაჩნია, რომ კომისიის წევრები უნდა მონაწილეობდნენ ამგვარ წილისყრებში. ასევე ცნობილი გახდა, რომ რამდენიმე ოლქში შესაბამისმა თავმჯდომარეებმა მიიღეს გადაწყვეტილება, რომ ის წევრები, რომლებიც უარს აცხადებდნენ წილისყრებში მონაწილეობაზე, არც სხვა წილისყრებში მიიღებენ მონაწილეობას და თავმჯდომარის შესაბამის მითითებებს შეასრულებდნენ დღის განმავლობაში".

გარდა ამისა, ნაცვლიშვილის თქმით, ნაძალადევის 26-ე და დიდუბის მე-11 უბანზე, დაფიქსირდა სადამკვირვებლო ორგანიზაციების წევრების მხრიდან ეთიკის ნორმების დარღვევა და არასათანადო ქცევა, რაც მისივე თქმით, შესაძლოა წარმოადგენდეს კომისიის საქმიანობაში ჩარევას და ეწინააღმდეგენა მოქმედ კანონმდებლობას.