ოსკარი 2018 წლის ფავორიტს, ფრენსის მაკდორმანდს, რომელმაც ჯილდო საუკეთესო მსახიობი ქალის ნომინაციაში მიიღო ფილმისთვის Three Billboards outside Ebbing, Missouri , წვეულებაზე ქანდაკება მოპარეს.

ეჭვმიტანილი ღონისძიებაზე დამსწრე ტერი ბრაიანტი გახლდათ, რომელმაც ოსკარი პირდაპირ მსახიობის მაგიდიდან აიღო. ბრაიანტი იმავე დღეს დააკავეს და ქანდაკება აცრემლებულ მაკდორმანდს დაუბრუნეს.

ფოტო: Jay L. Clendenin / Los Angeles Times

ფოტო: Getty Images

თუმცა, პროკურორების განცხადებით, გამოძიებამ წინ ვერ წაიწია, რის გამოც ლოს-ანჯელესელმა მოსამართლემ საქმე შეწყვიტა. საქმის შეფერხების ოფიციალური მიზეზი უცნობია, თუმცა ტაბლოიდების ინფორმაციით, გამოძიებასთან მსახიობი არ თანამშრომლობდა.

ლოს-ანჯელესის პოლიციის თქმით, ბრაიანტს ოსკარის შემდეგ გამართულ ცერემონიაზე ბილეთი ჰქონდა ნაყიდი. მან ოსკარის უნებართვოდ აღების შემდეგ ვიდეოც ჩაწერა, რომელშიც ამბობს "ჩვენ ეს შევძელით!"

ბრაიანტის ადვოკატის თქმით, ის ჯილდოს დატოვებას არ აპირებდა.

2018 წლის ოსკარის ცერემონიაზე, დოლბის სცენაზე ასულმა ფრენსისმა სამადლობელი სიტყვის წარმოთქმისას ყველა ნომინირებულ ქალს ფეხზე წამოდგომა სთხოვა და ამით მოუწოდა მათ მხარი დაეჭირათ ქალებისთვის მსოფლიოს გარშემო.

მაკდორმანდმა პირველი ოსკარი 1997 წელს მიიღო, ფილმისთვის ფარგო.