ეროვნული გმირის, გიორგი ანწუხელიძის დაბადების დღეზე ბათუმში მისი სახელობის ქუჩაზე საქართველოს ფორმის აბრები დაამონტაჟეს. ქუჩას ანწუხელიძის სახელი შარშან მიენიჭა, ახლა კი ოფიციალურად დამისამართდა.

"სიმბოლურად დავამაგრეთ ანწუხელიძის ქუჩაზე სამისამართო დაფა, რომელიც გამოხატული არის ერთიანი საქართველოს რუკის სახით და მასზე არის დატანილი ეროვნული გმირის გვარი. აღნიშნულით გამოვხატავთ ძალიან დიდ ტკივილს, ხსოვნას და დიდ პატივისცემას ყველა იმ ადამიანის წინაშე, რომელიც საკუთარი სიცოცხლის ფასად შეეწირა საქართველოს ერთიანობას", — განაცხადა ბათუმის მერმა ლაშა კომახიძემ აჭარის ტელევიზიასთან.

ანწუხელიძის ქუჩა ლეხ და მარია კაჩინსკების ქუჩის დასასრულიდან აეროპორტის გზატკეცილამდე გრძელდება.

გიორგი ანწუხელიძე საქართველოს ეროვნული გმირია. 2008 წლის აგვისტოს ომის დროს ის ტყვედ ჩაუვარდა საოკუპაციო რეჟიმის წარმომადგენლებს. ანწუხელიძე აწამეს, რის შემდეგაც ძმათა სასაფლაოზე მოკლეს. მას დღეს 35 წელი შეუსრულდებოდა.