თბილისის საქალაქო სასამართლოში მაგისტრი მოსამართლის თანდასწრებით TV პირველის მფლობელის, ვატო წერეთლის დაკითხვა დასრულდა. ის პროკურატურამ დაკითხვაზე თიბისი ბანკის საქმის ფარგლებში დაიბარა.

ვატო წერეთელი ამ პროცესებს TV პირველს უკავშირებს და ამბობს, რომ "ეს საქმე არის სრული იდიოტიზმი".

"სამწუხაროდ, ჯერ ადამიანებს წაუყენეს ბრალი და შემდგომ დამიბარეს მე გამოკითხვაზე. ჩემი აზრით, ეს არის სრული იდიოტიზმი", — განაცხადა ვახტანგ წერეთელმა.

ვახტანგ წერეთელის თქმით, პროკურატურა 11 წლის წინანდელი ტრანზაქციების შიდა დეტალებით დაინტერესდა.

"ერთი კითხვის დასმა ვცადე, მაინტერესებდა, ვინ იყო დაზარალებული ან მომჩივანი. ვერც პასუხი ვერ მივიღე და მოსამართლემაც გამაჩერა, რომ არ მქონდა უფლება კითხვების დასმის. ამ საქმეს არც დაზარალებული ჰყავს და არც მომჩივანი. იმ ქვეყანაში, სადაც ამდენი გამომძიებელი 11 წლის წინანდელ საქმეზე მუშაობს, არის დიდი ეჭვი. ტელევიზიაზე იყო კონკრეტული შემოტევები და ყოველთვის ყველაფერი უკავშირდება, სავარაუდოდ, ამ ტელევიზიას",— განაცხადა ვახტანგ წერეთელმა.

ის ფიქრობს, რომ მისი ოჯახის წევრზე, "კონკრეტულად ავთო წერეთლის წინააღმდეგ უნდათ სისხლის სამართლის საქმის აღძვრა".

TV პირველის მფლობელი, ვახტანგ (ვატო) წერეთელი იმ კომპანიების მფლობელია, რომლებიც თიბისი ბანკიდან ფულის გათეთრების საქმეში ფიგურირებს. პროკურატურის ინფორმაციით, ბანკმა იმ კომპანიებზე გასცა 17 მილიონი დოლარის სესხი, რომელმაც თიბისის დამფუძნებელებს მამუკა ხაზარაძესა და ავთო ჯაფარიძეს იგივე თანხა ასესხა.

საჯარო რეესტრის მონაცემებით, ვახტანგ წერეთელი შპს სამგორი თრეიდის 50%-იანი წილის მფლობელი, ხოლო შპს სამგორი M-ში 20%-იანი წილის მფლობელია. ორივე კომპანია სესხის აღებამდე დაახლოებით 2 წლით ადრე დაფუძნდა.