პარლამენტი თავმჯდომარე არჩილ თალაკვაძე TV პირველის მფლობელის, ვატო წერეთლის გამოკითხვაზე დაბარებას გამოეხმაურა და თქვა, რომ ყველა თანასწორია კანონის წინაშე, განურჩევლად იმისა, მედიის წარმომადგენელია თუ ოპოზიციონერი:

"თუ ჩვენ ვაშენებთ სახელმწიფოს, სადაც დაცულია კანონის უზენაესობის პრინციპი, მაშინ, თითოეული მოქალაქე კანონის წინაშე პასუხისმგებელია არა, როგორც მედიის წარმომადგენელი, ხელისუფლების წევრი, ან ოპოზიციონერი, არამედ, როგორც მოქალაქე, ვისზეც ვრცელდება კანონები. თუ ვინმე დაიბარეს პროკურატურაში და გამოკითხეს, ეს კანონმდებლობის ფარგლებში ხდება... მედიის თავისუფლება ჩვენთვის ფუნდამენტურია. ჩვენ მიგვაჩნია, რომ თავისუფალი მედია და ობიექტური ჟურნალისტიკა დემოკრატიის აუცილებელი შემადგენელია", — ამბობს არჩილ თალაკვაძე.

პროკურატურაში On.ge-ს განუცხადეს, რომ ვატო წერეთელს, სავარაუდოდ, ზეგ, 8 აგვისტოს გამოკითხავენ. მან საგამოძიებო ორგანოში გამოკითხვაზე უარი განაცხადა და ფეისბუქის გვერდზე დაწერა, რომ მხოლოდ მოსამართლის თანდასწრებით გასცემს პასუხს გამომძიებელს. ვატო წერეთელი, მის მიმართ გამოძიების გააქტიურებას, TV პირველის კრიტიკულ სარედაქციო პოლიტიკას უკავშირებს:

"... წინასწარ გეუბნებით, TV პირველს არ მოგაგუდინებთ!!! ეს ტელევიზია არც არავის გავლენის ქვეშ გადავა და არც არავის ტრენდზე! შანსი გაქვთ ნული! ყველას ვერ დაიჭერთ! ყველას ვერ დააშინებთ!" — წერს ვატო წერეთელი.