2013 წელს თხილამურების სრიალის დროს დაშავებული გერმანელი მრბოლელის ჯანმრთელობის შესახებ ინფორმაცია იშვიათად ვრცელდება. ამჯერად ფერარის ბოსი ჯინ ტოდტი ამბობს, რომ მიხაელ შუმახერი დანებებას არ აპირებს.

ტოდტი ფორმულა 1-ის ჩემპიონის მეგობარი და ყოფილი კოლეგაა.

"მიხაელი საუკეთესო ადამიანების ხელშია და მას საკუთარ სახლში მზრუნველობას არ აკლებენ. ის არ ნებდება და ბრძოლას აგრძელებს. მისი ოჯახიც აგრძელებს ბრძოლას, რა თქმა უნდა ჩვენი მეგობრობა ისეთივე აღარაა, როგორიც ოდესღაც იყო, რადგან ძველებური კომუნიკაცია აღარ გვაქვს, მაგრამ ისევ ვუყურებთ ფორმულა 1-ს ერთად", — თქვა მან ფრანგულ რადიოსთან საუბრისას.

შუმახერი 2013 წლის 29 დეკემბერს ალპებში თხილამურებით სრიალის დროს კლდეს დაეჯახა. მიუხედავად იმისა, რომ ის ჩაფხუტს ატარებდა, შუმახერმა თავის ტვინი დაიზიანა და 6 თვე კომაში გაატარა.

2014 წლის 16 ივნისს მიხაელ შუმახერი კომიდან გამოვიდა, 9 სექტემბერს კი კლინიკა დატოვა და ამ დრომდე მკურნალობისა და რეაბილიტაციის პროცესს სახლში გადის.

მრბოლელის მდგომარეობასთან დაკავშირებით უამრავი სპეკულაცია ვრცელდებოდა. მისი მენეჯერი რეგულარულად ასწორებს მედიაში გავრცელებულ ცნობებს შუმახერის ჯანმრთელობის მდგომარეობასთან დაკავშირებით. 2015 წლის დეკემბერში მან უარყო ინფორმაცია, რომ ფორმულა 1-ის ლეგენდამ სიარული შეძლო და გამოცემა Bunte "საშობაოდ ყალბი იმედების გავრცელებაში" დაადანაშაულა.

ბოლო ცნობების მიხედვით, მიხაელ შუმახერი პარალიზებულია და ეტლსაა მიჯაჭვული, მას მეხსიერების პრობლემები აქვს და ლაპარაკი არ შეუძლია.

2019 წლის იანვარში, ოჯახმა შუმახერის 50 წლის იუბილეზე ფეისბუქიდან მხარდამჭერებს მადლობა გადაუხადა და სთხოვა, რომ ისეთი მგრძნობიარე საკითხი, როგორიც ჩემპიონის ჯანმრთელობის მდგომარეობა იყო, საჯაროდ არ განეხილათ.

მათ ასევე დააანონსეს აპლიკაცია, რომელიც ფანებს ვირტუალური მუზეუმიდან გააცნობდა მიხაელ შუმახერის წარმატებებს. ის უკვე ხელმისაწვდომია App Store-სა და Google Play-ზე.