იუსტიციის ყოფილი მინისტრი, ზურაბ ადეიშვილის ამბობს, რომ 2007 წელს სახელმწიფოს აარიდეს ის, რაც "2018-ში გახდა ცხადი". ადეიშვილის თქმით, იმ დროს რუსებისა და ბიზნესმენ ბადრი პატარკაციშვილის მხრიდან სახელმწიფოს მიტაცების მცდელობა იყო.

რუსთავი 2-ის ყოფილ გენერალურ დირექტორთან, ნიკა გვარამიასთან საუბრისას ის ყვება, რომ 2012-ში სახელმწიფო მიიტაცეს და ეს ცხადი 2018 წელს, საპრეზიდენტო არჩევნების დროს გამოჩნდა.

"2012-ში ეს მოხდა, მაგრამ საზოგადოებას სხვა არგუმენტებიც ჰქონდა, რის გამო უნდა შეცვლილიყო ხელისუფლება და შემდეგ გახდა ცნობილი, აბსოლუტურად სხვა ხელისუფლება მივიღეთ", — აღნიშნა იუსტიციის ყოფილმა მინისტრმა.

ხელისუფლებამ 7 ნოემბრის აქციების პერიოდში არაერთი ფარული ჩანაწერი გაავრცელა. ადეიშვილის თქმით, 2007 წელს ფარული ჩანაწერების გასაჯაროება შეცდომა იყო.

გავრცელებულ ჩანაწერებს შორის იყო, სავარაუდოდ, თავდაცვის მაშინდელი მინისტრი, ირაკლი ოქრუაშვილი, რომელიც სასჯელაღსრულების დეპარტამენტის უფროსს, ბაჩო ახალაიას აქციის დაშლას სთავაზობდა.

7 ნოემბრის აქციის ძალისმიერად დაშლის შემდეგ, შინაგან საქმეთა სამინისტრომ აუდიოჩანაწერი და ვიდეომასალა გამოაქვეყნა, რომელიც საშუალებას აძლევდა ხელისუფლებას განეცხადებინა, რომ ოპოზიციის ზოგიერთი ლიდერი რუსეთის კონტრდაზვერვის სამსახურთან თანამშრომლობდა.

მასალაში წარმოდგენილი იყო ლეიბორისტული პარტიის ლიდერის, შალვა ნათელაშვილის, რესპუბლიკური პარტიის წევრის, ლევან ბერძენიშვილისა და თანასწორობის ინსტიტუტის დამაარსებლის, გიორგი ხაინდრავას ჩანაწერები იმ ადამიანებთან, რომლებიც შსს-ს ცნობით "რუსეთის კონტრდაზვერვის სამსახურის ოპერატიული მუშაკები იყვნენ".

კიდევ ერთ სატელეფონო ჩანაწერში, სავარაუდოდ, დეპუტატი ლევან ბერძენიშვილი იგივე პიროვნებას ესაუბრება საქართველოს გეგმების შესახებ დსთ-სთან დაკავშირებით. ფარული კამერით გადაღებულ კადრებში, სავარაუდოდ, გიორგი ხაინდრავა ხვდება ადამიანს, რომელიც, შსს-ს ცნობით, რუსეთის კონტრდაზვერვის სამსახურის თანამშრომელია.

ამავე დღეს გავრცელდა მორიგი ჩანაწერი, რომელშიც კონსტანტინე გამსახურდიას ძმა, ცოტნე გამსახურდია რუსეთის საელჩოს წარმომადგენელს ხვდება. ასევე გამოქვეყნდა სატელეფონო ჩანაწერი, რომელშიც ცოტნე გამსახურდია საყვედურობს თავის ძმას, კონსტანტინე გამსახურდიას და ცალკე სატელეფონო საუბარში შალვა ნათელაშვილს, როგორ გაუშვა ოპოზიციამ შანსი ხელიდან მას შემდეგ, რაც 150 000 ადამიანი შეიკრიბა პარლამენტის წინ 2 ნოემბერს.

ამავე თემაზე: