თბილისის აეროპორტში დაკავებული სამხრეთ აფრიკის მოქალაქის ადვოკატი ამტკიცებს, რომ 20 კილოგრამი მარიხუანა მისი დაცვის ქვეშ მყოფს პირადი მოხმარებისთვის სჭირდებოდა. მისი თქმით, დაკავებულმა იცოდა, რომ საქართველოში მარიხუანას მოხმარება ლეგალურია და ამიტომაც წამოიღო.

"ეს არის ტურისტი, რომელიც ჩამოვიდა საქართველოში. არ იცოდა რამდენი ხანი დარჩებოდა. ეს არის მისი გაზრდილი მარიხუანა, რომელსაც თვითონაც მოიხმარს", — განუცხადა ადვოკატმა ჟურნალისტებს.

კითხვაზე, რატომ დასჭირდა პირადი მოხმარებისთვის 20კგ მარიხუანა, ადვოკატი პასუხობს, რომ სინამდვილეში მას 18,4 კგ გადმოჰქონდა. დამაზუსტებელ კითხვაზე კი ამბობს, რომ რაოდენობა ვიზიტის ხანგრძლივობის არცოდნამ განაპირობა. "შესაძლებელია დარჩენილიყო წლების განმავლობაში", — ამბობს ის.

ფოტო: შემოსავლების სამსახური

ფოტო: შემოსავლების სამსახური

ფინანსთა სამინისტროს შემოსავლების სამსახურის განცხადებით, 27 ივლისს, თბილისის აეროპორტში, ეჭვის საფუძველზე, სამხრეთ აფრიკიდან მომავალი მგზავრის კუთვნილ ხელბარგში 20 კილოგრამი მარიხუანა აღმოაჩინეს. შემოსავლების სამსახური აღნიშნავს, რომ მგზავრს საეჭვო ტრანზიტული მარშრუტი ჰქონდა.

გამოძიება განსაკუთებით დიდი ოდენობით ნარკოტიკული საშუალების უკანონო შეძენა-შენახვა-გადაზიდვისა და განსაკუთებით დიდი ოდენობით ნარკოტიკული საშუალების საქართველოში უკანონოდ შემოტანის ფაქტებზე, საქართველოს სსკ-ს 273-ე მუხლის მე-6 ნაწილით და 262-ე მუხლის მე-4 ნაწილის ა ქვეპუნქტი მიმდინარეობს.