გივი თარგამაძის ავტომობილის აფეთქების შედეგად დაშავებული 5 პირი საავადმყოფოში გადის მკურნალობას. ექიმების ცნობით, მძიმეა ერთი მოქალაქის მდგომაროება, რომელმაც მიიღო სხეულის მრავლობითი დაზიანება, მათ შორის, მუცლის ღრუში, დაუზიანდა ღვიძლი. დაშავებულს ჩაუტარდა გადაუდებელი ოპერაცია და მისი მდგომარეობა ამ დროისათვის დამაკმაყოფილებელია.

რაც შეეხება დანარჩენ ოთხ პირს, მათ შედარებით მსუბუქი დაზიანებები მიიღეს. დაშავებულთაგან ერთ-ერთი გივი თარგამაძის მძღოლია, რომელიც ტვინის შერყევის დიაგნოზით რჩება საავადმყოფოში. სხვა დაშავებულები გამვლელები და კოლმეურნეობის მოედანზე მომუშავე გარემოვაჭრეები არიან.

4 ოქტომბერს, საღამოს, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ოთხია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.

ფაქტს ქვეყნის წინააღმდეგ მიმართული დივერსია უწოდა პრემიერმინისტრმა გიორგი კვირიკაშვილმა. მან პირობა დადო, რომ შემთხვევას გამოიძიებენ და "ვერცერთ დამნაშავეს ვერ დაიცავს ვერანაირი იმუნიტეტი, ან სხვა ქვეყნის მოქალაქეობა".