კოლმეურნეობის მოედნის მიმდებარე ტერიტორიაზე რამდენიმე წუთის წინ ნაციონალური მოძრაობის წევრის, გივი თარგამაძის მანქანა აფეთქდა. ინფორმაციას კურიერთან სატელეფონო ჩართვაში ადასტურებს თავად თარგამაძეც, რომელიც ამბობს, რომ შემთხვევა იმ დროს მოხდა, როცა ოფისიდან გამოვიდა. საჭესთან მისი მძღოლი იჯდა:

"სამსახურიდან გამოვედი ჩვეულებრივ, ამოვუხვიე კოლმეურნეობის მოედანზე. თავიდან უცებ ვერ მივხვდი რა მოხდა, მეგონა, წინიდან გვესროლეს რაღაცა, როცა ცოტა გონს მოვედით, გადმოვედით. მე და ჩემს მძღოლს ბევრი ფიზიკური დაზიანება არ გვაქვს. სამწუხაროდ, შევამჩნიე, ერთი ადამიანი გადაიყვანეს საკაცით, როგორც ჩანს ის უფრო მძიმედ არის დაშავებული. როგორც მეუბნებიან, სამი ადამიანი გადაიყვანეს".

ფოტო: Facebook/გიორგი კანდელაკი

ფოტო: Facebook/გიორგი კანდელაკი

როგორც თარგამაძემ სატელეფონო ჩართვისას განაცხადა, მანქანას უკანა ნაწილი პრაქტიკულად მოგლეჯილი აქვს. ის ამბობს, რომ ავტომობილი სპეციალურად ააფეთქეს და ასაფეთქებელი მანქანის უკანა ნაწილზე იყო მიმაგრებული:

"მანქანა გაზზე არ იყო და დარწმუნებული ვარ, დისტანციური პულტით ააფეთქეს". როგორც ის ამბობს, მოგვიანებით ისაუბრებს იმის შესახებ, თუ რას უკავშირებს ამ აფეთქებას.

აფეთქების შედეგად დაზიანდა სხვა ავტომობილებიც, მათ შორის მიკროავტობუსები და ავტობუსიც.

შსს-ში აცხადებენ, რომ ჯერჯერობით ინფორმაციას ამოწმებენ.