"არც კი დამითვლია, იმდენი წიგნია", — ამბობს On.ge-ის რეპორტაჟის გმირი და რაჭული სოფლის ერთადერთი მოსწავლე ნინო მეტონიძე, რომელსაც ეროვნული ბიბლიოთეკის მოძრაობა ეკვილიბრიუმმა სახლში უახლესი გამოცემებით ბიბლიოთეკა მოუწყო, კომპანია გალფმა კი პლანშეტი აჩუქა. თხმორი მეათასე სოფელია, რომელსაც ეკვილიბრიუმი ეწვია.

ფოტო: გიორგი კეკელიძე • Giorgi Kekelidze / Facebook

On.ge-სთან საუბარში ნინო ყვება, რომ ეროვნული ბიბლიოთეკის დირექტორი, გიორგი კეკელიძე მას სოფელ თხმორში 25 ივლისს ესტუმრა. სტუმრებს სოფლის თავში დახვდა და სახლამდე მიაცილა:

"დედაჩემმა, როგორც ყოველთვის, პურ-მარილი გაშალა. არ ველოდებოდი ასეთ საჩუქრებს, ჭკუაზე აღარ ვიყავი, აღფრთოვანებისგან ემოციები არ მყოფნიდა. პირველად რომ დავინახე, ვთქვი, იმდენი წიგნია, ამათ მთელი ზაფხული მოვუნდები-მეთქი. ზოგი წიგნი ინგლისურ ენაზეა, ზოგი — ქართულზე. დღეს დილით უკვე დავიწყე "დაკარგული სულების ქალაქის" კითხვა".

ფოტო: გიორგი კეკელიძე • Giorgi Kekelidze / Facebook

ფოტო: გიორგი კეკელიძე • Giorgi Kekelidze / Facebook

"ჩემი ცხოვრების ერთ-ერთი უმთავრესი და ცოტა ჯადოსნური დღე", — ასე აფასებს ფეისბუქის საკუთარ გვერდზე გიორგი კეკელიძე რაჭაში, ნინოსთან სტუმრობას.

"მოსწავლეც და მასწავლებლებიც ნამდვილი გმირები არიან და საქართველო კი, აი, აქ არის. აქ არის, მაგრამ გადასარჩენი და მოსავლელი... ჩამოსული ბავშვების გარემოცვაში მყოფი ნინო ამაყი და ბედნიერი იყო, ცრემლს მალავდა და იღიმოდა. ჩვენც ვიღიმოდით და ცრემლს ვმალავდით. რადგან უკეთესი მომავლისთვის უნდა გაიღიმო, იბრძოლო, იშრომო და გაიღიმო", — ამბობს გიორგი კეკელიძე.

ნინო მეტონიძე 17 წლის მე-11 კლასელია ამბროლაურის რაიონის სოფელი თხმორიდან. იგი დედასთან, მაკა მეტონიძესთან ერთად ცხოვრობს. სკოლაში მეზობელ სოფელ ნამანევში დადის. იქ მისასვლელად კვირაში რამდენჯერმე ექვსი კილომეტრის მოშორებით ფეხით სიარული უწევს. მისულს კი მხოლოდ მასწავლებლები ხვდებიან. ნინო ერთადერთი მოსწავლეა.

გაიგეთ მეტი: