პრეზიდენტის პრესსპიკერმა ეკა მშველაძემ, 4 ოქტომბრის ბრიფინგზე წინასაარჩევნო გარემო შეაფასა.

მისი თქმით, პრეზიდენტი იმედს გამოთქვამს, რომ 8 ოქტომბრამდე დარჩენილ დროში და არჩევნების დღესაც სახელმწიფო ინსტიტუციების მხრიდან უზრუნველყოფილი იქნება მოქალაქეების უსაფრთხოება, სამართლიანი და მაღალი სტანდარტის საარჩევნო პროცესი:

"არჩევნები ეს არის უმნიშვნელოვანესი სახელმწიფოებრივი პროცესი, როდესაც საქართველომ კიდევ ერთხელ უნდა დაუდასტუროს საკუთარ თავს და საერთაშორისო საზოგადოებას, რომ ჩვენ შეგვიძლია ცივილური, ევროპული სტანდარტის არჩევნების ჩატარება".

პრესსპიკერმა ჟურნალისტების შეკითხვას უპასუხა, თუ ვის აკისრებს პრეზიდენტი პასუხისმგებლობას ოპოზიციური პარტიების მიმართ მომხდარ ინციდენტებზე. ეკა მიშველაძის განმარტებით, პასუხისმგებლობა, პირველ რიგში, სახელმწიფო ინსტიტუციებს ეკისრება, ასევე პოლიტიკურ პარტიებს:

"ზოგადად ფონი შეიძლება ითქვას, რომ არის მშვიდი. რა თქმა უნდა, არის ცალკეული ძალიან ცუდი ფაქტები. იმედი გვაქვს და სამართალდამცავ ორგანოებს მოვუწოდებთ, ეს ცალკეული ფაქტები იქნება გამოძიებული და დროული და ადეკვატური პასუხი გაეცემა".

პრეზიდენტის პრესსპიკერის თქმით, სახელმწიფოს მეთაური ყველა პოლიტიკურ ძალას კიდევ ერთხელ მოუწოდეს სიმშვიდისკენ.

"გვინდა ხაზი გავუსვათ, რომ საარჩევნო პროცესს საქართველოში რამდენიმე ასეული დამკვირვებელი დააკვირდება - 54 საერთაშორისო და 91 ადგილობრივი ორგანიზაცია, რაც კიდევ უფრო მეტად შეუწყობს ხელს სამართლიანი და სტაბილური საარჩვენო პროცესის უზრუნველყოფას".