საქართველოს პარლამენტის ახალმა თავმჯდომარემ, არჩილ თალაკვაძემ ამერიკის შეერთებულ შტატებში ვიზიტისას განაცხადა, რომ სასამართლო რეფორმას საზოგადოების, სამოქალაქო სექტორისა და პოლიტიკური პარტიების დიდი ნაწილის მხარდაჭერა აქვს. ინფორმაციას ამის შესახებ პარლამენტის პრესსამსახური ავრცელებს.

"ძალიან მნიშვნელოვანი მხარდაჭერა აქვს სასამართლო რეფორმებს, რომელსაც ჩვენ ვახორციელებთ. ეს არის სასამართლო რეფორმის მეოთხე ტალღა, რომელიც ქართულმა ოცნებამ პარლამენტში დაარეგისტრირა. მისი განხილვა საშემოდგომო სესიაზე მოხდება და მაღალი მხარდაჭერით, მას აუცილებლად დავამტკიცებთ. მნიშვნელოვანია, რომ ამ რეფორმას ასევე, მხარს უჭერს სამოქალაქო საზოგადოება და პოლიტიკური პარტიების დიდი ნაწილი", — განაცხადა თალაკვაძემ.

გარდა ამისა, პრესსამსახურის ინფორმაციით, თალაკვაძემ ისაუბრა პროპორციული საარჩევნო სისტემის დანერგვაზეც. მისი თქმით, ამ რეფორმას ხელისუფლება საზოგადოების მხარდაჭერით ატარებს.

"ჩვენ ერთად მოვახერხეთ და მივიღეთ ეს გადაწყვეტილება, ბიძინა ივანიშვილმა, ქართულმა ოცნებამ, ჩვენმა საზოგადოებამ, რომ საქართველო უკვე მზად არის, გადავიდეს სრულიად ახალი ტიპის გახსნილ პოლიტიკურ სისტემაზე", — განაცხადა მან.

სასამართლო რეფორმას სამოქალაქო საზოგადოებისა და პოლიტიკოსების მწვავე პროტესტი მოყვა. არასამთავრობო ორგანიზაციები, სამოქალაქო აქტივისტები, ოპოზიციური პარტიები და იუსტიციის საბჭოს არამოსამართლე წევრები აცხადებდნენ, რომ სასამართლოში კლანური მმართველობაა, რომელსაც ხელისუფლება ლობირებს. მოსამართლეების შერჩევის და დანიშვნის პროცეს არაერთი საპროტესტო აქცია და განცხადება მოყვა. აღსანიშნია ქართული ოცნების ყოფილი დეპუტატის, ეკა ბესელიასა და მისი მხარდაჭერების განცხადებებიც. სასამართლო სისტემის რეფორმაზე შეუთანხმებლობის გამო მათ პარტია დატოვეს.

რაც შეეხება საარჩევნო პროპორციულ სისტემას, ეს გადაწყვეტილება მმართველმა პარტიამ რამდენიმე დღიანი საპროტესტო აქციების შემდეგ მიიღო. პროპორციული სისტემის დანერგვა აქცია #სირცხვილიას მოთხოვნა იყო.

გაიგეთ მეტი: