სუხიშვილების ნაციონალური ბალეტის ბიუჯეტი ბოლო ექვს წელში 6 291 730 ლარი იყო. ანსამბლი დაფინანსებას ბიუჯეტიდან ყოველწლიურად, საშუალოდ, მილიონი ლარის ოდენობით იღებს. ეს ინფორმაცია On.ge-მ კულტურის სამინისტროდან საჯარო ინფორმაციის სახით მიიღო.

თუმცა, გარდა ბიუჯეტიდან პირდაპირი წესით დაფინანსებისა, მომსახურების გაწევის სანაცვლოდ ნაციონალური ბალეტი შემოსავალს იღებს სახელმწიფო უწყებებიდან.

On.ge დაინტერესდა რამდენია ბიუჯეტის დაფინანსების ფარგლებში ნინო სუხიშვილისთვის გათვალისწინებული ხელფასი, თუმცა ამ საკითხზე უწყებამ ნაციონალურ ბალეტთან გადაგვამისამართა. არც ნინო სუხიშვილი და არც ანსამბლის პრესსამსახური სატელეფონო ზარებს არ პასუხობენ.

სუხიშვილების ნაციონალური ბალეტის დაფინანსება On.ge-სთვის მას შემდეგ გახდა საინტერესო, რაც მათ ჰომოფობიისა და ტრანსფობიის საპირწონედ დაწესებულ "ოჯახის სიწმინდის დღეზე" იცეკვეს და მედიაში ნინო სუხიშვილის ჰომოფობიური შინაარსის განცხადებები გავრცელდა. მაგალითად, რამდენიმე კვირის წინ გეი ფილმის რეჟისორმა აღნიშნა, რომ ნინო სუხიშვილმა თქმით, ქართულ ცეკვაში გეი არ არსებობს და მოცეკვავეები დაბლოკა. ჰომოფობიური შინაარსის ბრალდებას სუხიშვილმა ჰომოფობიური ტექსტითვე უპასუხა და განმარტა: "ქართული ცეკვა კაცურია, ანსამბლში სხვა ორიენტაციის კაცი არ გვყოლია".