საქართველოს კომუნიკაციების ეროვნული კომისია აცხადებს, რომ ჟურნალისტმა შალვა რამიშვილმა ტელეკომპანია რუსთავი 2-ის დაკვეთით GFK-ს მიერ ჩატარებული საზოგადოებრივი აზრის კვლევის შედეგების კანონიერების შესწავლა მოითხოვა.

რამიშვილის განცხადებაში აღნიშნულია, რომ ჟურნალისტური საქმიანობის პროცესში გამოვლინდა კომპანია GFK-ის მიერ სოციალური კვლევის გაყალბების სავარაუდო ფაქტი.

საქართველოს კომუნიკაციების ეროვნულმა კომისიამ წერილობით მიმართა რუსთავი 2-ს, GFK-ს, ჟურნალისტ შალვა რამიშვილს და საკითხის სრულყოფილად შესწავლის მიზნით საქმესთან არსებული დოკუმენტაცია სრულად გამოითხოვა.

კომუნიკაციების ეროვნულმა კომისიამ მხარეებს ინფორმაციის წარმოსადგენად ვადა 2016 წლის 5 ოქტომბრამდე განუსაზღვრა.

საქართველოს ორგანული კანონის საქართველოს საარჩევნო კოდექსის მიხედვით საზოგადოებრივი აზრით მანიპულირება აკრძალულია და ამ მოთხოვნის დაცვაზე ზედამხედველობა ეკისრება საქართველოს კომუნიკაციების ეროვნულ კომისიას.