პარლამენტის ვიცე-სპიკერის, თამარ ჩუგოშვილის აზრით, რუსთავი 2-ის საქმის გამო ქართულ სასამართლო სისტემას მძიმე დარტყმები მიადგა. გარდა ამისა, ჩუგოშვილი ამბობს, რომ ყოფილი გენერალური დირექტორის, ნიკა გვარამიას რეპლიკები მოსამართლეების მიმართ იყო მიუღებელი, რაც სტრასბურგმაც დაამტკიცა.

"ვისაც არ დაეზარა ყველამ შეურაცხყოფები აყენა და შეაწმინდა ხელი და ყველანაირად ცუდი თქვა სასამართლოზე და მიმდინარე პროცესებზე. სრული დემონიზება იყო იმ ადამიანების, ვინც ამ საქმეებს იხილავდნენ და, მე ვფიქრობ, ახლა ვიღაცამ ბოდიში უნდა მოუხადოს", — აღნიშნა ვიცე-სპიკერმა იმედის ეთერში.

ამასთანავე, ჩუგოშვილი ეთანხმება იუსტიციის მინისტრს, თეა წულუკიანს, რომ სტრასბურგის გადაწყვეტილება ნიკა გვარამიას წინააღმდეგ გამოტანილი "ვერდიქტი" იყო.

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში რჩება საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნის. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

დროებითი მექანიზმის გაუქმების საკითხი გასაჩივრებას არ ექვემდებარება, თუმცა მხარეებს შეუძლიათ გადაწყვეტილების სხვა ნაწილები სტრასბურგის სასამართლოს დიდ პალატაში გაასაჩივრონ. ამისთვის მათ სამთვიანი ვადა აქვთ.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა.

ამავე თემაზე: